Toshkent viloyati IIBB YHXB barcha fuqarolarga Bo‘stonliq tumanidagi dam olish maskanlari yopilganligini, fuqarolar karantin payti hatto o‘z shaxsiy dala hovlilariga ham bora olmasliklarini, yo‘llarda vaqtinchalik postlar tashkil etilganligini eslatib o‘tdi.

Foto: Toshkent viloyati IIBB YHXB

“To‘g‘ri, kun isib borgani sari tog‘li hududlarga chiqish istagida bo‘lganlar soni ham ortib boraveradi. Karantin, ishga bormayapmiz, shunday vaqtda soya-salqindagi dala hovlimizga chiqib ketib, oilaviy dam olamiz deydiganlar soni ham o‘sadi. Ammo karantin o‘z nomi bilan karantin. Bekorga uyda qoling, ko‘chaga chiqmang, degan chaqiriqlar kun tartibiga chiqayotgani yo‘q”, — deya viloyat YHXB fuqarolarni, ayniqsa dam olishga ishqibozlarni to‘g‘ri tushinishga chaqirdi.

Shuningdek, tog‘li hududlarga olib boradigan avtomobil yo‘llari karantin sabab vaqtinchalik yopilgani va transport vositalari harakati to‘xtatilgani eslatib o‘tildi.

“Sarsongarchiliklarga uchramay desangiz, ancha yo‘l bosib, yarim yo‘ldan ortga qaytishni istamasangiz, karantin talablariga rioya eting. Uyda qoling, dam olishni uyda, oila davrasida ham o‘tkazsa bo‘ladi”, — deyiladi xabarda.

Eslatib o‘tamiz, Respublika maxsus komissiyasining 8-iyuldagi qarori bilan O‘zbekistonda 10-iyuldan 1-avgustga qadar karantin cheklovlari qaytadan kuchaytirildi. Shu sababli avtotransport harakati cheklandi. Faqat kunning muayyan vaqtidagina tegishli hududlar doirasida harakatlanishga ruxsat beriladi.

Shuningdek, bir qator obyektlar faoliyati, jumladan, parklar, buyum bozorlari, basseynlar, bog‘chalar, umumiy ovqatlanish obyektlari, bolalar oromgohlar, plyajlar va boshqa dam olish maskanlari faoliyati to‘xtatildi.