O‘zA bosh direktori o‘rinbosari, huquqshunos Xushnudbek Xudoyberdiyev “Ular” loyihasiga intervyu berdi. Suhbat davomida Xushnudbek nega MTRKning ba’zi kanallarida unga nisbatan taqiq qo‘yilgani haqida so‘zlab berdi.
Foto: “Ular” ko‘rsatuvidan skrinshot
“2014-yil edi. U payt shaxsiy saytimni ko‘proq yuritar edim. Mustaqillik arafasida ‘Yoshlar’, ‘Navo’ va ‘Bolajon’ kanallari (ekran) tepasida aylanib turadigan logotip qilishgan. U yerda O‘zbekiston bayrog‘i teskari bo‘lib qolgan… Uni skrinshotini olib, saytimda yozganman ‘Telekanallarda O‘zbekiston bayrog‘i almashib qoldi’ deb. Uni olib ‘Kun.uz’ chiqardi. U vaqtda ‘Kun.uz’ni Muhrim (A’zamxojayev) yuritar edi, adashmasam. Keyin tarqalib ketdi. ‘Daryo.uz’da, internetda muhokama bo‘ldi. Keyin ‘Yoshlar’ telekanalidan telefon qilishdi. O‘zimizga aytsangiz bo‘lar edi, shuni chiqarish shart edimi, kecha ‘Yoshlar’da ko‘rsatuvda chiqdingiz-ku, deb. Bo‘ldi, agar to‘g‘rilab qo‘ysanglar, o‘chirib tashlayman, dedim. Mana shu tanqiddan keyin o‘sha paytdagi kanal rahbariyati o‘zlarining qo‘l ostidagi uchta kanalda menga ‘zapret’ qo‘yishgan. Shundan keyin ‘qora ro‘yxat’ga tushib qolganman”, — dedi Xushnud Xudoyberdiyev.
Xushnudbek yuqoridagi vaziyatni ilgari “qora ro‘yxat”larning qay darajada mantiqsiz va ahmoqona ekaniga misol deb atadi.
“Biz o‘ylaymiz ‘qora ro‘yxat’ tepadan bo‘lsa kerak, deb. Yo‘q, pastdagilar ham o‘zlari shaxsiy tomorqasiga o‘xshatib qilavergan”, — deydi huquqshunos.
Xushnudbekning aytishicha, bu taqiq 2017-yil, tuzum o‘zgargandan so‘ng, olib tashlangan.
