“Kadis” 14 yillik tanaffusdan so‘ng La Ligaga qaytdi va “Real” sobiq futbolchisi transferini e’lon qildi

Ispaniyaning “Kadis” klubi 14 yil ichida ilk marta La Liga yo‘llanmasini qo‘lga kiritdi.

40-turdan so‘ng jamoa 69 ochko to‘plagan holda, Segundada (nufuzi bo‘yicha Ispaniyada La Ligadan keyin 2-o‘rinda turadigan futbol musobaqasi) peshqadamlik qilmoqda. 2-pog‘onada esa 64 ochko bilan “Ueska” bormoqda.

Musobaqa yakunlanishiga 2 tur qolganida “Kadis” o‘zi uchun 2-o‘rindan past bo‘lmagan pog‘onani kafolatlab qo‘ydi. Qayd etish joiz, klub oxirgi marta yuqori divizionda 2005/2006-yilgi mavsumda ishtirok etgan.

“Kadis” prezidenti Manuel Viskaynoning so‘zlariga ko‘ra, klub La Liganing keyingi mavsumida ishtirok etish uchun birinchi xaridni amalga oshirgan. Klub “Real” va Ispaniya terma jamoasining sobiq hujumchisi Alvaro Negredoni o‘z safiga qo‘shib olgan. Hozirda Negredo “An-Nasr” (Saudiya Arabistoni) sharafini himoya qilmoqda.

“Jamoamiz La Ligadagi birinchi transferini amalga oshirdi, bu — Alvaro Negredo”, — deydi Viskayno.

Ma’lumot uchun, Negredo 2018-yildan beri “An-Nasr” klubi sharafini himoya qilib keladi. U Madridning “Real” klubi tarbiyalanuvchisi hisoblanadi. Bundan tashqari, 34 yoshli hujumchi vaqtida “Sevilya” va “Manchester Siti” singari klublarda to‘p surgan. Ispaniya terma jamoasi safida esa u 21 ta o‘yin o‘tkazib, 9 ta gol urgan.