Toyota Land Cruiser Prado mexanik uzatmalar qutisidan voz kechadi

Toyota Land Cruiser Prado Avstraliyada o‘zining texnik qismiga tegishli yangilanishlarni amalga oshirishga tayyorlanmoqda — yo‘ltanlamas kuchliroq dvigatel, zamonaviy multimedia tizimi va qator yangi assistentlarga ega bo‘ladi, biroq GX va GXL versiyalaridan mexanik uzatmalar qutisi olib tashlanadi, deb xabar beradi Motor.

177 ot kuchiga ega to‘rt silindrli 2,8 litrli turbodizel quvvati 204 ot kuchiga qadar (500 Nm) ko‘tariladi — Prado ortidan Toyota HiLux pikapi ham xuddi shu kabi motorga ega bo‘ladi.

Yangilangan Prado’ning transmissiyasidan olti pog‘onali “avtomat” o‘rin oladi. Avstraliya bozorida 24 yildan buyon sotuvga chiqarilayotgan yo‘ltanlamas birinchi bor mexanik uzatmalar qutisisiz sotiladi.

Shuningdek, yangilangan Prado’ning mediakompleksi Apple CarPlay and Android Auto smartfonlari bilan integratsiyalashadi — salondagi CD-pleyer va audio “razyom”lar olib tashlanadi.

Yordamchilar ro‘yxati yangilangan favqulodda tormozlanish tizimi bilan to‘ldiriladi, u piyodalar va velosipedchilarni kuduz kuni ajrata olish funksiyasiga ega bo‘ladi. Bundan tashqari, harakat vaqtida qatorni ushlab turish va tezlikka oid yo‘l belgilarini tanish tizimlari o‘rnatiladi.

Car Advice ma’lumotlariga ko‘ra, mazkur Prado avgust oyida konveyrdan chiqishni boshlaydi va kuzga borib avtosalonlarda sotiladi.

Avstraliyada iyun oyida Toyota Land Cruiser Prado’ga bo‘lgan talab koronavirus pandemiyasi sabab tushib ketgan ko‘rsatkichlardan so‘ng, 16 foizga oshdi. Dilerlarning so‘zlariga ko‘ra, avstraliyaliklar mamlakat bo‘ylab sayohat qilish uchun to‘liq uzatmalari avtomobillarni ko‘proq xarid qilmoqda.

Eslatib o‘tamiz, aprel oyida Toyota Land Cruiser’ning Xitoyda ishlab chiqarilgan “egizagi” — Hengtian L4600 yo‘ltanlamasining videosi paydo bo‘lgan edi. Xitoy nusxasining saloni originalidan ham hashamatli ko‘rinishga ega bo‘lgan.