Isroil hukumati mamlakat Sog‘liqni saqlash vazirligining tavsiyalariga binoan klublar, barlar, sport va madaniy muassasalarni zudlik bilan yopishga qaror qildi. Bu haqda “Interfaks” xabar berdi.
Ma’lum qilinishicha, Isroil Sog‘liqni saqlash vazirligi sinagoglarni yopishni ham tavsiya qilgan, biroq mamlakat ichki ishlar vaziri Arye Derining taklifiga ko‘ra, sinagoglar ibodat qiluvchilarni qabul qilishda davom etadi, biroq bir vaqtda 19 nafardan ortiq kishining ibodat qilishi mumkin emas.
Mamlakat bosh vaziri Binyamin Netanyaxuning ma’lum qilishicha, kasallanganlar soni, jumladan, og‘ir kasallar soni kun sayin keskin oshmoqda. Ayni paytda 90 nafar bemorning ahvoli og‘ir, ularning soni har kuni ikki baravarga ko‘paymoqda. Uning qayd etishicha, yaqin haftalar ichida yuzlab va minglab og‘ir ahvoldagi bemorlar kelib tushishi mumkin.
Milliy xavfsizlik kengashi rahbari Mehr bin Shabbotning ma’lum qilishicha, mamlakat to‘liq yopilishdan bir qadam narida turibdi. Uning qayd etishicha, agar 6-iyul kuni hech qanday qaror qabul qilinmasa, bir haftadan keyin mamlakatni to‘liq yopish masalasini muhokama qilishga to‘g‘ri keladi.
Mamlakat Sog‘liqni saqlash vazirligi avvalroq hukumatga restoranlarga 20 nafardan ortiq tashrif buyuruvchini qabul qilishga ruxsat bermaslikni, o‘rta va katta yoshli bolalar uchun bolalar oromgohlarini yopishni, 50 kishidan ortiq odam ishtirokidagi banketlar o‘tkazishni taqiqlashni tavsiya qilgan. Avtobuslarga ko‘pi bilan 20 nafar yo‘lovchi tashish taklif qilinmoqda, bunda avtobus konditsionerlari o‘chirilgan va derazalari ochilgan holda harakatlanishi kerak.
Shuningdek, vazirlik davlat muassasalariga xodimlarning 30 foizini masofadan ishlashga o‘tkazishni tavsiya qilgan.
Isroilda koronavirus tarqalishi tezlashayotgani haqida iyun oyida xabar qilingan. Unga qadar mamlakat bosqichma-bosqich ochilayotgandi, rasmiylar va shifokorlar epidemiyani tez yengdi, deb hisoblanayotgandi. Aprel oyining o‘rtasida mamlakatda 12 855 nafar bemor qayd etilgandi va 148 kishi vafot etgandi. 6-iyul holatiga ko‘ra, mamlakatda 30 162 nafar bemor qayd etilgan, 332 kishi kasallik qurboniga aylangan. Ayni paytda 11 856 nafar bemor kasallikdan davolanmoqda, 90 nafar bemor og‘ir ahvolda.
Isroil hukumati 25-iyun kuni xorijliklarning mamlakatga kirishga qo‘yilgan taqiqini 1-avgustgacha cho‘zishga qaror qilgan.
Izoh (0)