O‘zbekistonning tashqi savdo aylanmasi 2020-yilning yanvar—may oylari davomida 12,9 milliard dollarni tashkil etib, 2019-yilning mos davriga nisbatan 2,4 milliard dollarga yoki 15,9 foizga kamaydi. Bu haqda Davlat statistika qo‘mitasi hisobotida ma’lum qilindi.

Foto: “Daryo”

Hisobotga ko‘ra, joriy yilning besh oyida tashqi savdo aylanmasida eksport hajmi 5,1 milliard dollarga teng bo‘lgan va o‘tgan yilning mos davriga nisbatan 15,6 foizga kamaygan. Import hajmi 7,8 milliard dollarni tashkil qilgan bo‘lib, 2019-yilning mos davriga nisbatan pasayish 16,1 foizni tashkil qilgan. Hisobot davrida 2,6 milliard dollar qiymatida passiv tashqi savdo balansi yuzaga kelgan.

Qayd etilishicha, O‘zbekiston jahonning 150 dan ortiq mamlakati bilan savdo aloqalarini amalga oshirib kelmoqda. Tashqi savdo aylanmasining nisbatan salmoqli hissasi Xitoy (17,9 foiz), Rossiya (16,9 foiz), Qozog‘iston (8,4 foiz), Janubiy Koreya (7,3 foiz), Turkiya (5,5 foiz), Qirg‘iziston (2,3 foiz) va Afg‘oniston (2,0 foiz) davlatlarining ulushlariga to‘g‘ri kelmoqda.

Qo‘mita tomonidan ma’lum qilinishicha, tashqi iqtisodiy faoliyat bo‘yicha 20 ta yirik hamkor-davlat orasidan beshta davlatda aktiv tashqi savdo balansi kuzatilgan. Ular qatoridan Afg‘oniston (263,2 million dollar), Qirg‘iziston (211,2 million dollar), Tojikiston (117,8 million dollar), Fransiya (27,1 million dollar) va Eron (7,9 million dollar) o‘rin olgan. Qolgan 15 ta davlatlar bilan passiv tashqi savdo balansi saqlanib qolmoqda.