O‘zbekiston 2020-yilning 1-iyun holatiga ko‘ra, qiymati 48 million dollarga teng bo‘lgan jami 23,5 ming tonna gilosni 11 ta xorijiy mamlakatga eksport qildi. Gilos eksporti o‘tgan yilning mos davriga nisbatan ikki baravarga oshdi. Bu haqda Davlat statistika qo‘mitasi ma’lum qildi.

Foto: Prezident matbuot xizmati

Qo‘mita ma’lumotlariga ko‘ra, ushbu mamlakatlar orasida Qozog‘iston 12,4 ming tonna, Rossiya 6,7 ming tonna, Qirg‘iziston 4,1 ming tonna bilan yuqori ulushga ega bo‘ldi.

Ma’lum qilinishicha, joriy yilda o‘zbek gilosi Janubiy Koreya va Tailandga ham eksport qilindi. Joriy yilning 1-iyun holatiga ko‘ra, Janubiy Koreyada 51,8 tonna mahsulot 206,8 ming dollarga sotilgan.

Shuningdek, O‘zbekiston gilosi Xitoy, Polsha, Birlashgan Arab Amirliklari, Belarus, Ukraina, Turkmaniston bozorlariga ham yetkazib berilgan.