AOKA shtabida tashkil qilingan brifingda Vazirlar Mahkamasi huzuridagi Ta’lim sifatini nazorat qilish inspeksiyasi axborot xizmati rahbari Feruza Madrahimova fuqarolardan kelib tushgan savollarga javob qaytardi.
“Xorijiy davlatlarda ta’lim olganlik to‘g‘risidagi hujjatlarni tan olish uchun testlarning dastlabki bosqichini sinov tariqasida Toshkentga yaqin hududlarda o‘tkazish belgilandi. Unga ko‘ra, test o‘tkaziladigan kunlar 2020-yilning 18-iyundan boshlanadi. Imtihon Ta’lim sifatini nazorat qilish davlat inspeksiyasi binosida bo‘lib o‘tadi.
Imtihonda huquqshunoslik, sog‘liqni saqlash va ijtimoiy ta’minot, iqtisodiyot, qishloq xo‘jaligi, muhandislik, ishlov berish va qurilish hamda o‘qituvchilar tayyorlash va pedagogik fanlar sohalari bo‘yicha sinov testlari o‘tkaziladi.
Inspeksiya tomonidan imtihonda ishtirok etuvchilar ro‘yxati shakllantirildi. Ushbu ro‘yxatga Toshkent shahri, Toshkent va Sirdaryo viloyatining epidemiologik jihatdan barqaror hududlarida istiqomat qiluvchi talabgorlar kiritilgan. Boshqa talabgorlar uchun sinovlar qachon va qay tartibda tashkil etilishi bo‘yicha qo‘shimcha axborot beriladi. Sinovlar karantin qoidalariga qat’iy amal qilgan holda o‘tkaziladi.
Xorijiy davlatlarda ta’lim olganlik to‘g‘risidagi hujjatlarni tan olish uchun belgilangan sinov testlariga o‘z vaqtida kelmagan, sinov testida ishtirok etuvchilar ro‘yxatida mavjud bo‘lmagan talabgorlar hamda tibbiy niqobi bo‘lmaganlarga sinovlarga kirishga ruxsat etilmaydi.
Shuningdek, fuqarolardan kelib tushayotgan arizalar asosida keyingi bosqichlarda epidemiologik vaziyat barqarorlashayotgan hududlarda hududning o‘ziga borgan holda testlarni tashkil etish rejalashtirilmoqda”, – dedi inspeksiya axborot xizmati rahbari.
Izoh (0)