Iker Kasilyas “Real” tarixidagi eng yaxshi ikki o‘yinchi kimligini aytdi

“Real” sobiq darvozaboni Iker Kasilyas Madrid klubi tarixidagi eng yaxshi ikki o‘yinchi deb kimlarni hisoblashini aytdi.

“Klub tarixidagi uch nafar eng yaxshi futbolchi? Uchinchisi haqida biron narsa deya olmayman, lekin ikki nafarini aytishim mumkin. Bular Don Alfredo di Stefano va Krishtianu Ronaldu”, — deydi Kasilyas.

Iker Kasilyas 1998-yildan 2015-yilgacha madridliklar o‘yinchisi bo‘lgan. Shu yillar davomida u 5 marta Ispaniya chempionatida, 3 marta Chempionlar Ligasida g‘alaba qozongan.

Di Stefano esa “Real” safida 1953-yildan 1964-yilgacha o‘ynagan. U klub bilan 18 ta sovrin qo‘lga kiritadi, jumladan, Ispaniya chempionatida 8 bor, Yevrokuboklarda 5 marta zafar quchgan.

Ronaldu 2009—2018-yillar oralig‘ida “Real” safida to‘p suradi va klub tarixidagi eng yaxshi to‘purarga aylanadi. U “qirollik klubi”da 438 ta o‘yin o‘tkazib, 450 bor raqiblar darvozasini ishg‘ol etgan. Di Stefano 396 o‘yinda 308 ta gol bilan uchinchi o‘rinni egallagan.

Ronalduning tovoni bilan urgan goli yodingizdami?