AQShda politsiya tomonidan qo‘lga olingan qora tanli Jorj Floydning o‘limidan so‘ng, mamlakatning ko‘plab shaharlarida yuzaga kelgan ommaviy norozilik namoyishlari davom etmoqda. Mazkur namoyishlar fonida ayrim ishtirokchilar mahalliy dilerlik markazlariga o‘g‘rilikka tushgan. Ko‘plab avtomobillar o‘g‘irlab ketilgan, ayrimlari esa yoqib yuborilgan, deb xabar beradi Motor.

Foto: Motor

Marodyorlar Kaliforniya shtatidagi Oklend shahrida joylashgan Mercedes-Benz dilerining avtosaloni oynalarini sindirib, uning ichiga kirgan. Noma’lum kimsalar zalga qo‘yilgan yangi C-Class, CLA va GLE modellarini ustiga bo‘yoqlar bilan chizib tashlab, shikast yetkazgan. Bundan tashqari, jinoyatchilar qiymati 150 ming dollar turadigan Mercedes-AMG GT Coupe’ni yoqib yuborgan.

Foto: Motor

Ushbu shaharda joylashgan Honda dilerining biroz omadi chopgan. Bosqinlar oqibatida marodyorlar vitrinalarni sindirib, qiymati 30 ming dollar turadigan CR-V krossoverini minib qochgan. Shuningdek, vandallar yana bir avtomobilni yoqib yuborib, ofisdagi barcha texnikalarni o‘g‘irlagan.

Eng ko‘p zararni Sen-Leandro shahrida joylashgan Chrysler Dodge Jeep avtodileri ko‘rgan. Salon egasi har birining narxi kamida 100 ming dollar turadigan 50 ga yaqin Dodge Challenger Hellcat sportkarlaridan ayrilgan.

Marodyorlar avtosalonga kirib, kalitlar saqlanadigan seyfni ochgan va har bir avtomobilni minib qochgan. Salon egasining so‘zlariga ko‘ra, barcha sportkarlarga o‘g‘rilik holatlariga qarshi datchiklar o‘rnatilgan va hozirda minib qochilgan avtomobillarning aksariyati yo‘llar bo‘ylab erkin harakatlanmoqda.

Foto: Motor

Avvalroq AQShdagi norozilik namoyishchilari Manxettendagi do‘konlarni o‘margani haqida xabar berilgandi. Apple kompaniyasi esa o‘g‘irlangan iPhone’larni “g‘ishtga” aylantirib qo‘ygan.