O‘zbekistonda nikohlanuvchi yoshlarni oilaviy hayotga tayyorlash maqsadida Yoshlarni oilaviy hayotga tayyorlash markazlarini tashkil etish rejalashtirilmoqda. Bu haqdagi Vazirlar Mahkamasi qarori jamoatchilik muhokamasi uchun e’lon qilindi.
Qarorga ko‘ra, Yoshlarni oilaviy hayotga tayyorlash markazlari yuridik shaxs maqomiga ega bo‘lmagan holda tuman (shahar) mahalla va oilani qo‘llab-quvvatlash bo‘limlari tuzilmasida tashkil etiladi.
Mahalla va oilani qo‘llab-quvvatlash vazirligi tomonidan taklif qilingan “Oila institutini yanada rivojlantirish va yoshlarni oilaviy hayotga tayyorlash chora-tadbirlari to‘g‘risida”gi hukumat qarori loyihasida yangi markazning vazifalari ko‘rsatib o‘tilgan.
Unga ko‘ra, Yoshlarni oilaviy hayotga tayyorlash markazlari zamonaviy oilaning namunali shaklini hamda “Oila — muqaddas”, “Sog‘lom oila — sog‘lom jamiyat”, “Oila jamiyat va davlat himoyasida” va “Farovon oila — jamiyat ravnaqining asosi” konseptual g‘oyalarini nikohlanuvchilarning ongiga singdirib borishi kerak bo‘ladi.
Shuningdek, markazlar tomonidan nikohlanuvchi shaxslarni oilaviy-huquqiy munosabatlar, oilaviy hayot psixologiyasi, oila iqtisodi va budjeti, reproduktiv salomatlik asoslari, ma’naviy-axloqiy qadriyatlarni mustahkamlash masalalari bo‘yicha tizimli tayyorlashni yo‘lga qo‘yish rejalashtirilmoqda. Nikohlanuvchi shaxslarda oilaviy qadriyatlarni saqlash, oilalarda sog‘lom ma’naviy-axloqiy muhitni yaratish hamda ibratli ota-ona bo‘lish ko‘nikmalarini shakllantirishda ko‘maklashish ham markazlar vazifalari qatoridan joy oladi.
Mazkur markazlarda mashg‘ulotlar, nazariy-amaliy kurslar, mahorat saboqlari, davra suhbatlari, seminar-treninglarni ilg‘or ijobiy xorijiy tajribalarni inobatga olib, o‘quv jarayoniga eng so‘nggi ilmiy-uslubiy texnologiyalar va reklama-axborot usullarini joriy etgan holda tashkil etish ko‘zlanmoqda.
Mazkur qaror bilan Yoshlarni oilaviy hayotga tayyorlash markazlari to‘g‘risidagi nizomni tasdiqlash ham nazarda tutilgan.
Markazlar faoliyatini “Mahalla” xayriya jamoat fondiga har yili o‘tkaziladigan umumxalq xayriya hasharidan tushadigan tushumlar, Yoshlar ittifoqi mablag‘lari, tuman (shahar) mahalliy budjetlarining qo‘shimcha manbalari, yuridik va jismoniy shaxslarning homiylar xayriyalari, xalqaro tashkilotlar grantlari, qonun hujjatlari bilan taqiqlanmagan boshqa manbalar hisobidan moliyalashtirish rejalashtirilmoqda.
Markazlarga yaqindan yordam berish va faoliyatini samarali tashkillashtirish masalalari tuman darajasida tuman (shahar) mahalla va oilani qo‘llab-quvvatlash bo‘limi boshlig‘ining birinchi o‘rinbosari, viloyat darajasida mahalla va oilani qo‘llab-quvvatlash boshqarmasi boshlig‘ining birinchi o‘rinbosari, oilaviy qadriyatlarni mustahkamlash bo‘yicha bosh mutaxassis, respublika darajasida Mahalla va oilani qo‘llab-quvvatlash vazirining birinchi o‘rinbosari, oilaviy qadriyatlarni mustahkamlash boshqarmasi boshlig‘i zimmasiga yuklanadi.
Shuningdek, qarorga muvofiq oila institutini ilmiy-amaliy tadqiqotlar asosida tizimli rivojlantirish maqsadida Mahalla va oilani qo‘llab-quvvatlash vazirligi huzurida Oila institutini rivojlantirish ilmiy-amaliy maslahat kengashi tuzish rejalashtirilgan.
Eslatib o‘tamiz, Yoshlarni oilaviy hayotga tayyorlash markazlarini tashkil etish to‘g‘risidagi hukumat qarori loyihasi 2019-yilning noyabr oyida ham muhokama uchun e’lon qilingandi.
Izoh (0)