Ichki ishlar vazirligi “O‘zbekiston Respublikasining fuqaroligiga qabul qilishda davlat tilini bilish darajasini aniqlash tartibi to‘g‘risidagi nizomni tasdiqlash haqida”gi Vazirlar Mahkamasi qarori loyihasini muhokamaga qo‘ydi.
Loyihada qayd etilishicha, davlat tilini bilish darajasini aniqlash va davlat namunasidagi malaka sertifikatini berish Alisher Navoiy nomidagi Toshkent davlat o‘zbek tili va adabiyoti universiteti huzuridagi davlat tilida ish yuritish asoslarini o‘qitish va malaka oshirish markazi yoki uning hududiy bo‘linmalari tomonidan to‘lov asosida amalga oshiriladi.
Davlat tili bo‘yicha imtihon talabgorning doimiy yashash joyi bo‘yicha hududiy Markazda o‘tkaziladi.
Davlat tilini bilish darajasini aniqlash davlat tilini bilishga qo‘yiladigan minimal talablar asosida test shaklida amalga oshiriladi. Tilni bilish darajasini aniqlashga tayyorgarlik ko‘rish, test materiallarini tayyorlash maqsadida Oliy va o‘rta maxsus ta’lim vazirligi tomonidan ishchi guruh shakllantiriladi.
Talabgor davlat tilini bilish darajasini aniqlash bo‘yicha test sinovida qatnashish uchun ariza bilan Markazga shaxsan o‘zi murojaat qilib quyidagi hujjatlarni taqdim etadi:
- shaxsni tasdiqlovchi hujjat (hujjatdan nusxa olinib asli egasiga qaytarib beriladi);
- 3,5 x 4,5 sm o‘lchamli rangli, orqa foni oq rangdagi fotosurat;
- davlat tilini bilish darajasini aniqlash uchun yig‘im to‘langanligi to‘g‘risidagi kvitansiya.
Test sinovi Oliy va o‘rta maxsus ta’lim vazirligi tomonidan tasdiqlangan imtihon komissiyasi a’zolari va kuzatuvchilar ishtirokida o‘tkaziladi. Test savollari soni 20 ta bo‘lib, 30 daqiqa vaqt beriladi.
Test sinovi yakunlari bo‘yicha eng yuqori ballning 50 foizidan kam (15 balldan kam) ball olgan talabgor o‘tmagan deb hisoblanadi va qayta qatnashish uchun, test sinovlari o‘tkazilgan kundan boshlab kamida bir oydan keyin, belgilangan tartibda ariza bilan murojaat qilib to‘lov to‘lagan taqdirda test sinovlariga qo‘yiladi.
Davlat tilini bilish darajasini aniqlash uchun bazaviy hisoblash miqdorining 20 foizi miqdorida to‘lov to‘lanadi.
Talabgor ko‘rsatilgan hujjatlarni Markazga topshirganidan so‘ng, Markaz va talabgor o‘rtasida shartnoma tuzilgan hisoblanadi.
Test sinovidan muvaffaqiyatli o‘tgan talabgorga test sinovi natijalari e’lon qilingan kundan boshlab bir hafta mobaynida, Markaz buyrug‘i asosida sertifikat beriladi.
Eslatib o‘tamiz, fevral oyida fuqarolik olishda o‘zbek tilini muloqot darajasida bilish shart qilib belgilanishi mumkinligi haqida xabar berilgandi. Oliy Majlis Qonunchilik palatasining 18-fevraldagi yalpi majlisida “O‘zbekiston Respublikasi fuqaroligi to‘g‘risida”gi qonun loyihasi qizg‘in muhokama etilgan va qabul qilingandi.
Izoh (0)