Shavkat Mirziyoyev: “Maktab darsliklari saviyasi talabga mutlaqo javob bermaydi”

Yaqinda Toshkent shahri Sergeli tumanining 5A mavzesida 329-umumiy o‘rta ta’lim maktabi foydalanishga topshirildi. Prezident Shavkat Mirziyoyev 29-may, juma kuni ushbu ta’lim maskani faoliyati bilan tanishdi, deb yozmoqda Prezident matbuot xizmati.

Xabarga ko‘ra, Sergeli tumanida 2019-yilda to‘rtta yangi maktab qurish ishlari boshlangan va hozirda ularning ikkitasi qurib bitkazilgan.

329-umumiy o‘rta ta’lim maktabi 1680 o‘quvchiga mo‘ljallangan. Unga asos solishda 2019-yilda tashkil etilgan Prezident maktablari tajribasidan foydalanilgan.

To‘rt qavatli maktabda 48 ta o‘quv xonasi mavjud. Shundan 20 tasi fan kabineti, 14 tasi boshlang‘ich sinf xonasi va yana 14 tasi xorijiy tillarni o‘qitishga mo‘ljallangan. Laboratoriya va to‘garak xonalari, elektron kutubxona, tibbiyot punkti, oshxona, faollar zali, sport maydonlarida zamonaviy sharoitlar yaratilgan.

Maktab direktori tanlov asosida, o‘qituvchilar esa test sinovlari natijasida ishga qabul qilingan.

Prezident maktab darsliklari saviyasi talabga mutlaqo javob bermasligi, o‘quv dasturlarini ilg‘or xorijiy bilimlar asosida takomillashtirish zarurligini ta’kidladi. Bolalarga sifatli ta’lim berish, shu bilan birga, 7-sinfdan boshlab kasbga yo‘naltirish bo‘yicha ko‘rsatmalar berdi.

“O‘g‘il-qizlar hunar o‘rgansa, o‘ziga ishonchi ortadi, dunyoqarashi ham o‘sadi, ota-onasining ham ko‘ngli to‘q bo‘ladi. Keyinchalik ijtimoiy muammolarni bartaraf etishga mablag‘ sarflamaslik uchun bugun shu mablag‘ni maktablarga berishimiz kerak. Bolalarimizni vatanparvar, jamiyatga kerakli inson qilib tarbiyalamasak, kelajakka xiyonat qilgan bo‘lamiz”, — dedi Shavkat Mirziyoyev.