Navoiyda uyi buzilgan ayol o‘zini yoqishga urindi. MIB uyning buzilishi qonun doirasida amalga oshirilganini ta’kidlamoqda

27-may kuni ijtimoiy tarmoqlarda Karmana tumanida istiqomat qiluvchi fuqaro D.Abdullayevaning viloyat hokimligi binosi oldida o‘zini yoqib yubormoqchi bo‘lgani tasvirlangan video tarqaldi. Mazkur holat MIBning Navoiy viloyat boshqarmasi xodimlari va boshqa tegishli mutasaddilar ishtirokida o‘rganib chiqildi.

Aniqlanishicha, fuqarolik ishlari bo‘yicha Karmana tumanlararo sudining 2019-yil 3-oktabrdagi 2-2101-1904/15483-sonli ijro hujjatiga asosan, undiruvchi Karmana tuman hokimligi foydasiga qarzdor D.Abdullayevaga tegishli “Kalovat” mahallasi hududidagi tuman hokimligining zaxira yer maydonlarida noqonuniy qurilgan 9x40 metr o‘lchamdagi uy-joyini buzdirish to‘g‘risidagi ijro hujjati byuroning tuman bo‘limi ish yurituviga 15-oktabrda kelib tushgan. Davlat ijrochisi tomonidan ijro ishi yuritishni qo‘zg‘atish to‘g‘risida qaror qabul qilinib, qaror nusxasi D.Abdullayevaga imzo qo‘ydirilgan holda tanishtirilgan va ijro harakatlari olib borilgan.

Ijro hujjati bo‘yicha 2020-yil 17-aprel soat 10:00 da majburiy ijro tayinlanganligi haqida xabarnoma tuman IIB va IIB YOXB organlari, kadastr, tibbiyot birlashmasi hamda mahalla raisiga topshirilgan.

Shu kuni qarzdorning “Kalovot” MFYdagi manziliga mutasaddi organlar bilan borilgan, ammo fuqarolik ishlari bo‘yicha Karmana tumanlararo sudining 2020-yil 17-fevraldagi “Ijro harakatlarini vaqtincha to‘xtatish to‘g‘risida”gi ajrimiga asosan ijro hujjati harakatdan to‘xtatilgan.

Shu sudning 24-martdagi “Ijro harakatlarini davom ettirish to‘g‘risida”gi ajrimi bo‘lim ish yurituviga 31-martda kelib tushgan va qarzdor 1-aprel kuni qayta ogohlantirilgan.

“D.Abdullayeva ijro hujjatini ixtiyoriy ravishda bajarishdan bosh tortib kelgani bois 25-may kuni soat 10:00 da yana majburiy ijro tayinlanib, qarzdorga bu haqida tushuntirish berilgan. Shunday keyin ham qarzdor sud qarorini ixtiyoriy ravishda bajarmaganligi sababli, soat 14:00 da uning mazkur uy-joyi mutasaddi organlar (IIB, IIB YOXB, Milliy gvardiya, tibbiyot birlashmasi, hokimlik vakili) ishtirokida majburiy tartibda buzdirilgan. Mazkur holat bo‘yicha davlat ijrochilarining xatti-harakatlarida qonun buzilishiga yo‘l qo‘yilmagan”, — deyiladi xabarda.