27 май куни ижтимоий тармоқларда Кармана туманида истиқомат қилувчи фуқаро Д.Абдуллаеванинг вилоят ҳокимлиги биноси олдида ўзини ёқиб юбормоқчи бўлгани тасвирланган видео тарқалди. Мазкур ҳолат МИБнинг Навоий вилоят бошқармаси ходимлари ва бошқа тегишли мутасаддилар иштирокида ўрганиб чиқилди.
Аниқланишича, фуқаролик ишлари бўйича Кармана туманлараро судининг 2019 йил 3 октябрдаги 2-2101-1904/15483-сонли ижро ҳужжатига асосан, ундирувчи Кармана туман ҳокимлиги фойдасига қарздор Д.Абдуллаевага тегишли «Каловат» маҳалласи ҳудудидаги туман ҳокимлигининг захира ер майдонларида ноқонуний қурилган 9х40 метр ўлчамдаги уй-жойини буздириш тўғрисидаги ижро ҳужжати бюронинг туман бўлими иш юритувига 15 октябрда келиб тушган. Давлат ижрочиси томонидан ижро иши юритишни қўзғатиш тўғрисида қарор қабул қилиниб, қарор нусхаси Д.Абдуллаевага имзо қўйдирилган ҳолда таништирилган ва ижро ҳаракатлари олиб борилган.
Ижро ҳужжати бўйича 2020 йил 17 апрель соат 10:00 да мажбурий ижро тайинланганлиги ҳақида хабарнома туман ИИБ ва ИИБ ЁХБ органлари, кадастр, тиббиёт бирлашмаси ҳамда маҳалла раисига топширилган.
Шу куни қарздорнинг «Каловот» МФЙдаги манзилига мутасадди органлар билан борилган, аммо фуқаролик ишлари бўйича Кармана туманлараро судининг 2020 йил 17 февралдаги «Ижро ҳаракатларини вақтинча тўхтатиш тўғрисида»ги ажримига асосан ижро ҳужжати ҳаракатдан тўхтатилган.
Шу суднинг 24 мартдаги «Ижро ҳаракатларини давом эттириш тўғрисида»ги ажрими бўлим иш юритувига 31 мартда келиб тушган ва қарздор 1 апрель куни қайта огоҳлантирилган.
«Д.Абдуллаева ижро ҳужжатини ихтиёрий равишда бажаришдан бош тортиб келгани боис 25 май куни соат 10:00 да яна мажбурий ижро тайинланиб, қарздорга бу ҳақида тушунтириш берилган. Шундай кейин ҳам қарздор суд қарорини ихтиёрий равишда бажармаганлиги сабабли, соат 14:00 да унинг мазкур уй-жойи мутасадди органлар (ИИБ, ИИБ ЁХБ, Миллий гвардия, тиббиёт бирлашмаси, ҳокимлик вакили) иштирокида мажбурий тартибда буздирилган. Мазкур ҳолат бўйича давлат ижрочиларининг хатти-ҳаракатларида қонун бузилишига йўл қўйилмаган», — дейилади хабарда.
Изоҳ (0)