6-may kuni O‘zbekiston Prezidenti Shavkat Mirziyoyev Turkmaniston prezidenti Gurbanguli Berdimuhamedov bilan telefon orqali suhbatlashgani haqida xabar berilgandi. TDH davlat axborot agentligining ma’lum qilishicha, suhbat davomida Berdimuhamedov O‘zbekistonga yordam ko‘rsatishga tayyor ekanligini bildirgan.

Foto: Sputnik

Ta’kidlanishicha, prezident Berdimuhamedov tabiiy ofat oqibatida katta zarar ko‘rgan O‘zbekiston xalqiga hamdardligini bildirgan, shuningdek, u Turkmaniston tomoni o‘z texnika va xodimlarini jabr ko‘rgan mintaqaga yuborib, hudud infratuzilmasini qayta tiklashda zudlik bilan yordam berishga tayyor ekanligini ma’lum qilgan.

Prezident Mirziyoyev taklifni qabul qilgan yoki qilmaganiga aniqlik kiritilmagan.

Fursatdan foydalanib, ikki davlat rahbari Ikkinchi jahon urushidagi g‘alabaning 75 yilligi munosabati bilan biri-birini qutlab, urush qatnashchilariga sihat-salomatlik, baxt va uzoq umr tilagan.

Eslatib o‘tamiz, 27-aprel kuni Turkmanistonning Lebop viloyatiga yopirilgan kuchli shamol va yog‘ingarchilik oqibatida ko‘plab uylar zarar ko‘rgan edi. Turkmanobod va boshqa ayrim hududlar aholisi o‘z uylari va infratuzilmasini mustaqil qayta tiklashga urinmoqda.

Davlat axborot nashrlarida sodir bo‘lgan voqea haqida hech narsa deyilmagan. Faqat oradan bir hafta o‘tgach mintaqaviy yangiliklar sayti viloyatdagi ishlar qayta boshlangani haqida yozgan.

6-may kuni Turkmaniston prezidenti viloyat rahbarlari bilan yig‘ilish o‘tkazgan. Berdimuhamedov Lepob viloyati hokimiga yangi qurilayotgan obyektlar va qishloq xo‘jaligi ishlarini qattiq nazorat ostiga olishni buyurgan. Viloyatda vayron bo‘lgan infratuzilmalarni qayta tiklash haqida prezident ham, hokim ham bir og‘iz gap aytmagan.

Ma’lumot uchun, Shavkat Mirziyoyev 2-may kuni Qozog‘iston prezidenti Qosim-Jo‘mart To‘qayev bilan telefon orqali bo‘lib o‘tgan muloqotda Sardoba suv omborida yuz bergan holatni muhokama qilgandi. Qirg‘iziston prezidenti So‘ronboy Jeenbekov bilan ham Sardobadagi favqulodda vaziyatni muhokama qilgan edi.