Koronavirus Xitoy laboratoriyalarida paydo bo‘lgani to‘g‘risidagi bayonot spekulyativ hisoblanadi. Bu haqda JSSTning sog‘liqni saqlash sohasidagi favqulodda vaziyatlar dasturi rahbari Maykl Rayanga tayanib, New York Post xabar berdi.
“Biz AQSh hukumatidan virusning kelib chiqishga oid biror-bir ma’lumotlarni yoki aniq isbotlarni olmadik. Bizning nuqtayi nazarimizga ko‘ra, bu (koronavirus Xitoyda sun’iy usulda yaratilgani to‘g‘risida) spekulyativligicha qolmoqda”, — deydi Rayan.
Uning qo‘shimcha qilishicha, JSST AQSh tomonidan koronavirus borasida berilgan har qanday ma’lumotni diqqat bilan o‘rganmoqda.
“Bu kabi ma’lumotlar paydo bo‘lsa, Amerika hukumati u bilan bo‘lishish to‘g‘risida qaror qabul qilishi kerak, biroq JSST bundayin axborot vakuumida harakat qilishga qiynalmoqda”, — deydi Rayan.
Avvalroq AQSh prezidenti Donald Tramp koronavirusning Xitoyning Uxan shahridagi laboratoriyadan kelib chiqqanligidan dalolat beruvchi ma’lumotlarga ega ekanligini ma’lum qilgandi. Aprel oyining o‘rtalarida esa AQSh Jahon sog‘liqni saqlash tashkilotini moliyalashtirishni to‘xtatgan edi.
Mavzuga doir: Tramp: “Xitoy koronavirus borasida katta xato qildi”
Izoh (0)