“Koronavirus bilan kasallangan fuqarolar uni qachon va kimdan yuqtirganini aniq bilmaydi”. Xayrulla Bozorov Namangan xalqiga murojaat yo‘lladi

Namangan viloyati hokimi Xayrullo Bozorov koronavirus tarqalishining oldini olish chora-tadbirlari yuzasidan aholiga murojaat yo‘lladi.

Murojaatda Namangan viloyatida koronavirusni yuqtirish bo‘yicha birinchi holatning 25-mart kuni qayd etilgani va unda 2 kishi kasallagani aytildi.

Shuningdek, viloyat hokimi hududda koronavirusni yuqtirib olganlarning umumiy soni 65 nafarga yetgani, shundan 22 nafari erkaklar, 43 nafari ayollar ekanini bildirdi. Namanganda koronavirusga chalinganlarning 11 nafari 18 yoshga kirgan yoshlar, 7 nafari 60 yoshdan o‘tgan keksa kishilardir.

Bozorov koronavirusga chalingan bir nafar odamning omma oldida yurishi bu 200 nafardan 400 nafargacha bo‘lgan kishilarga COVID-19 infeksiyasini yuqtirish ehtimolini oshirishini ta’kidlab o‘tdi.

Murojaatda qayd etilishicha, oxirgi uch kun ichida mazkur infeksiyani yuqtirgan, manbasi aniq bo‘lmagan oltita holat aniqlangan.

“Koronavirus bilan kasallangan fuqarolar bu kasallikni qachon va kimdan yuqtirib olganini aniq bilmaydi. Ayrimlar uyida isitmalab, buni oddiy shamollash deb o‘ylab, o‘zlarini uy sharoitida davolashga urinmoqda.

Oxirgi uch-to‘rt kun ichida to‘rtta holat aniqlangan, ularning uchtasi Namangan shahrida, bittasi Uchqo‘rg‘on tumanida yuz bergan. Ular bir necha kunlab, o‘n kunlab uylarida isitmalab yotishlari, o‘z vaqtida shifokorlarga murojaat etmaganliklari bugun ushbu kasallikning yuqish xavfini oshirib yubordi. Mazkur 4 nafar fuqaroning ikki nafari og‘ir ahvolda va sun’iy nafas oldiradigan apparatlarga ulangan.

Agar ular o‘z vaqtida shifokorlarga murojaat qilganlarida o‘z vaqtida aniq diagnoz qo‘yilardi, yaqin qarindoshlariga yuqtirilmas edi. Bugun ularning har biri orqasidan 200 dan ming nafargacha odamni karantinga olishga hojat bo‘lmas edi.

Koronavirusni yuqtirganlar oramizda yuribdi, ular kimlar, soni qancha, afsuski, biz buni bilmaymiz.

Immuniteti kuchli, sog‘lom yoshlarda kasallik alomatlari sezilmaydi, biroq ular koronavirus tashuvchisiga aylanishining ehtimoli yuqori”, — degan Xayrullo Bozorov.