28-mart kuni Qozog‘istonning Ko‘stanay shahrida Chevrolet brendi ostida UzAuto Motors avtomobillarini yig‘ish boshlandi. Konveyerni O‘zbekistondan teleko‘prik orqali ishtirok etgan O‘zbekiston bosh vaziri Abdulla Aripov hamda Qozog‘iston bosh vaziri Askar Mamin tantanali ravishda ishga tushirdi, deb xabar beradi UzAuto Motors.
General Motors kompaniyasi UzAuto Motors bilan birgalikda Cobalt (avvalgi Ravon R4) oilaviy sedani, tijoriy foydalanish uchun Damas va Labo hamda premium sinfiga mansub Malibu avtomobillarining yangi modellarini ishlab chiqarish bo‘yicha kelishuvga erishdi.
Yangi modellarni ishlab chiqarish avvalroq Ravon (Nexia R3) avtomobili ishlab chiqarilgan “SariarkaAvtoProm” MChSh quvvatlarida yo‘lga qo‘yildi. Barcha mahsulotlar General Motors kompaniyasi tomonidan belgilangan jahon standartlari asosida ishlab chiqariladi. Qozog‘istonda eng mashhur sanalgan Ravon Nexia R3 avtomobili ham endilikda Chevrolet brendi ostida ishlab chiqariladi. Ushbu yo‘nalishdagi keyingi qadam Chevrolet modellari qatorini yangi istiqbolli Tracker, Trailblazer va boshqa avtomobillar bilan to‘ldirishdir.
Dastlabki bosqichda ishlab chiqarish hajmi yiliga 26 000 transport vositasini tashkil qiladi, kelgusida uni 100 000 donaga yetkazish ko‘zda tutilgan. Shuningdek ishlab chiqarishning dastlabki yili davomida 13 000 ta avtomobillarni yaqin xorij davlatlariga eksport qilish rejalashtirilgan.
Eslatib o‘tamiz, loyiha 2020-yilning 26-fevral kuni Urganch shahrida chegaralararo hamkorlik forumi doirasida Allur Group kompaniyalar guruhi hamda “O‘zavtosanoat” AJ o‘rtasida tashkil etilgan QK doirasida amalga oshirilmoqda. Avvalroq 2017-yilning mart oyida O‘zbekiston Prezidentining Qozog‘istonga tashrifi chog‘ida “SariarkaAvtoProm” MChSh ishlab chiqarish quvvatlarida avtomobil ishlab chiqarishni yo‘lga qo‘yish bo‘yicha kelishuvga erishilgan. Ushbu davr mobaynida ichki va eksport bozorlariga mo‘ljallangan qiymati 85 million dollarlik bo‘lgan 11 mingdan ortiq yengil avtomobil ishlab chiqarilgan.
Izoh (0)