Isroil hukumati rahbari Benyamin Netanyaxu koronavirus tarqalishiga bog‘liq vaziyat yaqin vaqt ichida yaxshilanmasa, mamlakatni butunlay yopishga ruxsat beradi, deb yozadi Jerusalem Post.
Foto: AP Photo
Netanyaxu kasallar soni 2369 nafarga yetgan bir vaqtda boshqa chora yo‘qligini ma’lum qilgan.
“Hukumatimiz tomonidan qabul qilingan choralar butun dunyo bo‘ylab qilinayotgan ishlarga mos keladi. Biroq bu yetarli bo‘lmadi. Kasallar soni har uch kunda ikki barobarga oshyapti”, — deydi Netanyaxu. Uning so‘zlariga ko‘ra, ikki haftadan keyin Isroilda minglab yangi kasallar paydo bo‘lish xavfi mavjud.
Netanyaxuning aytishicha, hukumat tayyorgarlik ko‘rayotgan karantin ko‘chalar bo‘ylab sayr qilishni to‘liq taqiqlashni o‘z ichiga oladi. Ko‘chaga faqat oziq-ovqat yoki dori-darmon uchun chiqish, uydan uzog‘i bilan 100 metr masofaga uzoqlashish mumkin bo‘ladi.
Boshqa choralar qatoridan jamoat transporti faoliyatining qisqarishi, diniy marosimlarda ishtirokchilar sonini kamaytirish ko‘zda tutilgan. Avtomobillarda ikki nafardan ortiq inson o‘tirishi mumkin emas.
Shuningdek, mamlakatda karantin qoidalarini buzganlar jarimaga tortiladi yoki qamoqqa olinadi.
So‘nggi ma’lumotlarga ko‘ra, Isroilda pandemiya oqibatida besh kishi vafot etgan. Bundan tashqari, yana 39 nafar bemorning ahvoli og‘ir ekanligi aytilmoqda.
Avvalroq Isroil hukumati mamlakatga kiruvchi barchani karantinga joylashtirish bo‘yicha qaror qabul qilgan edi.
