MRB 50 yil davomida 120 dan ortiq davlatning maxfiy ma’lumotlaridan xabardor bo‘lib kelgani ma’lum bo‘ldi

Markaziy razvedka boshqarmasi Germaniya federativ respublikasi razvedkasi bilan hamkorlikda yarim asrdan ko‘proq vaqt mobaynida 120 dan ortiq davlatning maxfiy ma’lumotlaridan xabardor bo‘lib kelgan. Bu haqda The Washington Post nashri va Germaniyaning ZDF telekanali olib borgan qo‘shma tekshiruvda so‘z boradi, deya xabar beradi “RBK”.

Bunga shifrlash texnikasi bozorida 2000-yillargacha yetakchi bo‘lgan Shveysariyaning Crypto AG kompaniyasi tufayli erishilgan. Uning qurilmalarini Lotin Amerikasi harbiy xuntalari, Eron, Hindiston, Pokiston va Vatikan, jami 120 dan ortiq davlat xarid qilgan. Sovet Ittifoqi va Xitoy bu mamlakatlar sirasiga kirmagan.

MRB va Germaniya razvedkasi kompaniyaga 1970-yildan boshlab maxfiy ravishda egalik qilib kelgan. 1990-yillarda nemislar fosh etilishdan cho‘chib, o‘z ulushlarini amerikaliklarga sotgan. MRB esa aktivlardan 2018-yildagina, internetda shifrlash texnologiyalari rivojlangani asnosida qutilgandi.

“Bu yuz yillikning razvedka muvaffaqiyati edi. Xorijiy hukumatlar AQSh va Germaniyaga ularning eng maxfiy ma’lumotlari kamida ikki davlat qo‘lga kiritishi uchun katta mablag‘ to‘lab kelgan. O‘nlab yillar davomida, XXI asrgacha Crypto millionlab dollar daromad keltirgan”, — deyiladi xabarda.

Shveysariya rasmiylari The Washington Post va ZDF telekanalining qo‘shma materiali e’lon qilinganidan so‘ng, maqolada keltirilgan faktlarni o‘rganish uchun tekshiruv boshlanganini ma’lum qildi.