Марказий разведка бошқармаси Германия федератив республикаси разведкаси билан ҳамкорликда ярим асрдан кўпроқ вақт мобайнида 120 дан ортиқ давлатнинг махфий маълумотларидан хабардор бўлиб келган. Бу ҳақда The Washington Post нашри ва Германиянинг ZDF телеканали олиб борган қўшма текширувда сўз боради, дея хабар беради «РБК».
Бунга шифрлаш техникаси бозорида 2000 йилларгача етакчи бўлган Швейцариянинг Crypto AG компанияси туфайли эришилган. Унинг қурилмаларини Лотин Америкаси ҳарбий хунталари, Эрон, Ҳиндистон, Покистон ва Ватикан, жами 120 дан ортиқ давлат харид қилган. Совет Иттифоқи ва Хитой бу мамлакатлар сирасига кирмаган.
МРБ ва Германия разведкаси компанияга 1970 йилдан бошлаб махфий равишда эгалик қилиб келган. 1990 йилларда немислар фош этилишдан чўчиб, ўз улушларини америкаликларга сотган. МРБ эса активлардан 2018 йилдагина, интернетда шифрлаш технологиялари ривожлангани асносида қутилганди.
«Бу юз йилликнинг разведка муваффақияти эди. Хорижий ҳукуматлар АҚШ ва Германияга уларнинг энг махфий маълумотлари камида икки давлат қўлга киритиши учун катта маблағ тўлаб келган. Ўнлаб йиллар давомида, XXI асргача Crypto миллионлаб доллар даромад келтирган», — дейилади хабарда.
Швейцария расмийлари The Washington Post ва ZDF телеканалининг қўшма материали эълон қилинганидан сўнг, мақолада келтирилган фактларни ўрганиш учун текширув бошланганини маълум қилди.
Изоҳ (0)