Ishsizlik yoshlarning sinishi va o‘zi istamagan boshqa yo‘lni tanlashiga sabab bo‘ladi. Oliy Majlis Qonunchilik palatasi deputati Rasul Kusherbayev shunday fikr bildirgan.
Deputatga ko‘ra, Pensiya jamg‘armasi ma’sullari “innovatsion” hisob-kitoblari asosida ishlab chiqayotgan konsepsiyasi doirasida pensiya yoshini oshirish bo‘yicha ommaga singdirayotgan g‘oyasini ko‘rib shunday xulosaga kelish mumkin: yoshini yashab bo‘lgan qariyalar yoshlarni ishsiz qoldirmoqchi.
Amalda hozir erkaklar uchun pensiya yoshi 60, ayollar uchun 55 yoshni tashkil etadi. Endi buni erkaklarga 62 yosh, ayollarga 58 yosh qilishmoqchi.
Agar pensiya yoshi bir yoshga oshirilsa, bu o‘rtacha bir yilda pensionerlar hisobiga bo‘shashi mumkin bo‘lgan 200 mingdan 250 mingtagacha ish o‘rnining bo‘shamasligi va mehnat bozoriga kirib kelgan yoshlarning unga egalik qila olmasligiga sabab bo‘larkan.
Bir yilda mamlakat mehnat bozoriga o‘rtacha 600 ming yoshlar kirib kelayotganini hisobga olinsa, ish o‘rni bo‘shamasligi oqibatida bir necha yilda qancha yuz minglab yoshlardan iborat qo‘shimcha ishsizlar “armiyasi” paydo bo‘ladi.
“Ular nima qiladi? Omadi kelgani biznesga, omadi kelmagani esa o‘zini chetga urishi aniq. Qariyalarni tinmay ishlatishni o‘ylayotgan mutaxassislarimiz masalaning bu tomoniga e’tibor bermagan ko‘rinadi”, — deydi deputat.
Kusherbayevning qayd etishicha, Pensiya jamg‘armasi mas’ullari berayotgan bayonotlarida ishonchlarining yuqoriligidan, ular allaqachon parlament roziligisiz ham pensiya yoshini oshirish masalasini hal etib qo‘ygan ko‘rinadi. Ular Konstitutsiya va qonunlarga muvofiq, qonunlarni, shu jumladan, pensiya yoshini o‘zgartirishni qabul qilish vakolati parlamentda ekanligini yo bilishmaydi yo pisand qilmoqchi emasdek.
Aslida bu ularning taklifi xolos va Parlament buni qabul qilmasligi mumkin. Davlat rahbari darajasida hukumatning parlament oldidagi hisobdorligini oshirish, parlamentni “xalq uyi”ga aylantirish vazifasi qo‘yilgan bir vaqtda bunday bayonotlar Pensiya jamg‘armasining parlament, xalq bilan hisoblashishga xohishi yo‘qligini ko‘rsatmoqda.
“Biroq shuni unutmangki, toki qishloqlarda pensiya yoshiga yetib borishini kutayotgan qariyalar, ishga joylashishni orzu qilayotgan yuz minglab yoshlarning roziligi olinmaguncha, ko‘rishga ko‘z otishga o‘qingiz yo‘q deputatlarning tasdig‘idan o‘tmaguncha pensiya yoshini o‘zgartirishni borib suvga ayting. Siz qariyalar va yoshlarni o‘ylamasangiz, biz o‘ylaymiz. Chunki ular bizga ishongan, bizga ovoz bergan. Pensionerlar va yoshlar manfaatlarini himoya qilishni dasturlariga kiritib, va’da bergan partiyalar vakillariga ham masalaga befarq bo‘lmasliklarini so‘rardim”, — deya fikrini yakunlagan Kusherbayev.
Izoh (0)