Xitoy O‘zbekistonda arzon yuk avtomobillari ishlab chiqarish uchun 12 mln dollar ajratadi

“O‘zavtosanoat”, Sinotruk International Investment Limited va MAN Truck & Bus SE yangi korxona — Uz Truck and Bus Motors’ni tashkil etish to‘g‘risida kelishuv imzoladi. Bu haqda “O‘zavtosanoat” matbuot xizmati xabar berdi.

Ma’lum qilinishicha, yangi kompaniya O‘zbekistonda yuk avtomobillari ishlab chiqaruvchi JV MAN Auto-Uzbekistan negizida tashkil etib, uning ustav fondiga jami 12 million dollar investitsiya kiritdi.

Kiritilgan investitsiyalar ishlab chiqarish quvvatlarini yiliga 3 ming texnikadan 6 ming donaga yetkazish, yangi modellar ishlab chiqarishni o‘zlashtirish va butlovchi detallarni mahalliylashtirishga yo‘naltiriladi.

Qayd qilinishicha, yangi loyiha 100 dan ortiq ish o‘rinlari yaratish, eksportni oshirish, hamda yuk mashinalarini mahalliylashtirish darajasini 50 % gacha yetkazish imkonini beradi.