Xalqaro press-klub moderatori G‘ulom Samadov 15-yanvar, dushanba kuni Toshkent viloyatida joylashgan “Amirsoy” tog‘-chang‘i kurortida Xalqaro press-klubning navbatdagi sayyor sessiyasida o‘zbekistonliklar ko‘p axlat tashlayotganini aytdi.
Foto: Xalqaro press-klub
“Biz ko‘p go‘sht yemoqdamiz”, “Biz ko‘p suv ichmoqdamiz” — degan fikrlar ijtimoiy tarmoqlarda xayp bo‘ldi. Mayli, xayp bo‘lsa ham aytishim kerak, biz ko‘p axlat tashlamoqdamiz”, — degan u.
Eslatib o‘tamiz, 2019-yilning 10-sentabr kuni jurnalistlar bilan bo‘lib o‘tgan ochiq muloqotda Fermerlar kengashi raisi Aktam Hayitov o‘zbekistonliklar juda ko‘p go‘sht iste’mol qilayotganini, bu esa o‘z navbatida, go‘sht narxining oshishiga sabablardan biri ekanini ta’kidlagan edi.
Energetika vazirligi tizimidagi jamiyat bosh boshqarmasi boshlig‘i Abdurashid Mirzayev esa shu yilning 11-sentabrida jurnalistlar bilan bo‘lib o‘tgan muloqotda iste’mol madaniyati haqida gapirib, o‘zbekistonliklar juda ham ko‘p elektr energiyasi iste’mol qilayotganini bildirgan.
Qishloq xo‘jaligi vaziri Jamshid Xo‘jayev O‘zbekistonda qishloq xo‘jaligini rivojlantirishning 2020—2030-yillarga mo‘ljallangan strategiyasi loyihasi taqdimotiga bag‘ishlangan 14-sentabr kungi uchrashuvda “Arzon bo‘lgani uchun suvni ko‘p ishlatyapmiz va isrof qilyapmiz”, deb aytgan edi.
