Rossiyada noyabr oyi o‘rtalaridan buyon eng kam — bir sutkada 23 351 ta COVID-19 holati qayd etildi. Sankt-Peterburg ilk bor kunlik kasallanishlar bo‘yicha Moskvadan o‘zib ketdi

Rossiyada bir sutkada 23 351 ta koronavirusga chalinish holati qayd etildi, deb xabar bermoqda Meduza virus tarqalishiga qarshi kurashish tezkor shtabiga tayanib.

Yangi kasallanish holatlarining eng ko‘pi Sankt-Peterburg (3 657), Moskva (3 591) shaharlari hamda Moskva viloyatida (1250) aniqlangan. Shu kungacha mamlakatda kunlik kasallanganlar soni bo‘yicha Moskva yetakchilik qilib kelayotgandi.

Pandemiya boshlanganidan beri jami 3 260 138 kishi kasallangan.

Tezkor shtab ma’lumotlariga ko‘ra, so‘nggi sutkada COVID-19’dan 482 kishi vafot etgan, qurbonlarning umumiy soni 58 988 nafarga yetgan.

Yangi aniqlangan kasallanish holatlari soni 18-noyabrdan beri ilk bor kam bo‘ldi. O‘shanda 20 985 kishida virus aniqlangandi. Rossiyada butun dekabr davomida har kuni 26 mingdan 29 mingtagacha holatlar qayd etilgan. Rekord ko‘rsatkich 24-dekabrda kuzatilgan bo‘lib, 29 935 kishida COVID-19 aniqlangan.

Eslatib o‘tamiz, dekabr oyidan Rossiyaning barcha hududlarida koronavirusga qarshi emlash boshlandi. “Rospotrebnadzor” rahbari Anna Popova Rossiyada COVID-19 pandemiyasi bahorda tugashini taxmin qilgan.

Rossiyalik infeksionist Yevgeniy Timakov yanvar oyining ilk haftalarida mamlakatda koronavirusga chalinish holatlari ko‘payishi kutilayotganini bildirgan.