Donald Tramp AQSh raketa zarbasi oqibatida Bag‘dodda o‘ldirilgan eronlik general Qosim Sulaymoniyni jahondagi birinchi raqamli terrorchi deb atadi. Trampning ushbu bayonoti Oq uyning Twitter’dagi sahifasida e’lon qilingan.
AQSh prezidentining so‘zlariga ko‘ra, Eron Islom inqilobi muhofizlari korpusi (IIMK)ning “Al-Quds” maxsus bo‘linmasi qo‘mondoni bo‘lgan Sulaymoniy amerikaliklarga — har harbiylar, ham oddiy fuqarolarga qarshi qaratilgan terrorchilik harakatlarini uyushtirgan.
Trampning aniqlik kiritishicha, amerikaliklar Erondagi tuzumni almashtirishga urinayotgani yo‘q, biroq Tehronning Yaqin Sharqdagi tajovuzi to‘xtashi kerak. “Biz urush boshlash uchun emas, balki uning oldini olish uchun chora ko‘rdik”, — degan Tramp.
O‘z navbatida, Eronning BMTdagi doimiy vakili majid Taxt-Ravonchi CNN muxbiri bilan suhbatda AQShning harakatlarini “urush e’lon qilish” deb baholadi. “Bo‘lgan bu voqeaga jim qarab tura olmaymiz. O‘ch olamiz, qattiq o‘ch olamiz”, — dedi u.
Donald Tramp bundan avval IShID terrorchilik tashkiloti yetakchisi Abu Bakr al-Bag‘dodiyni birinchi raqamli terrorchi deb atagan edi. U 2019-yil oktabrida, AQShning Suriyadagi maxsus operatsiyasi natijasida yo‘q qilingan edi.
Izoh (0)