Oq uy mansabdori Mayk Daffi AQSh va Ukraina prezidentlari Donald Tramp va Vladimir Zelenskiy o‘rtasidagi telefon orqali muloqotdan 91 daqiqa o‘tib, Pentagon vakillari bilan bog‘langan hamda Kiyevga harbiy yordam ajratilishini to‘xtatib turishga ko‘rsatma bergan. Bu haqda “Interfaks” ma’lum qildi.
Daffi elektron maktubida ma’muriyatning mablag‘ ajratish haqidagi qarorni qayta ko‘rib chiqish rejasiga muvofiq AQSh mudofaa vazirligi yordam ko‘rsatishni to‘xtatib turishini so‘ragan.
“Ushbu so‘rovning nozik jihatlarini e’tiborga olgan holda mazkur ma’lumotni topshiriqni qanday bajarish kerakligini bilishi zarur bo‘lgan shaxslar bilan tig‘iz aloqada ushlab turganingizdan minnatdorman”, — deyiladi elektron maktubda.
Ma’lumot uchun, demokratlar Tramp va Zelenskiyning joriy yil 25-iyulidagi ushbu muloqoti tafsilotlari oshkor bo‘lganidan so‘ng AQSh prezidentiga nisbatan impichment jarayonini boshladi.
Izoh (0)