19-dekabr kuni Oliy sudda o‘tkazilgan ochiq sud majlislarida jazoni o‘tash muassasasida jazo o‘tayotgan 19 nafar ayolning nazorat tartibida bergan shikoyat arizasi ko‘rib chiqildi, deb xabar beradi O‘zA.
Oliy sud raisining o‘rinbosari Ikrom Muslimov raisligida o‘tgan ochiq sud majlislarida har bir ayolning nazorat tartibida bergan arizasi qonun doirasida batafsil ko‘rib chiqildi. Mahkuma ayollarning jazoning asosiy qismini o‘tagani, qilmishidan chin ko‘ngildan pushaymonligi, jazoni o‘tash jarayonida o‘zini ijobiy jihatlarini namoyon etib, muassasa rahbariyatining tashakkurnomasini olgani e’tiborga olindi.
Sud ajrimi bilan sodir etgan jinoyati uchun tayinlangan jazoning asosiy qismini o‘tagani, qilmishiga iqror va pushaymon bo‘lgani, yoshi hamda O‘zbekiston xotin-qizlar qo‘mitasining kafolati xati inobatga olinib, 19 nafar ayolga nisbatan tayinlangan jazolar qonunda belgilangan tartibda qisqartirildi. Bu ayollar qisqartirilgan jazo muddatini o‘tab bo‘lgani sababli sud zalidan qamoqdan ozod etildi va oilasi bag‘riga qaytarildi.
Eslatib o‘tamiz, 2018-yil 20-iyulda O‘zbekiston Oliy sudi va Xotin-qizlar qo‘mitasi o‘rtasida memorandum imzolangan. Memorandum doirasida joriy yilning o‘tgan to‘qqiz oyida jazoni 148 nafar ayolga Xotin-qizlar qo‘mitasi kafilligi asosida ozodlikdan mahrum qilish bilan bog‘liq bo‘lmagan jazo tayinlangan edi.
Izoh (0)