Namanganda tabiiy gaz bosimi 5 baravar ko‘tarildi

Namangan viloyati hududida aholiga yetkazib berilayotgan tabiiy gazning taqsimlash stansiyalaridan chiqish bosimi 3-dekabrga o‘tar kechasi besh baravarga oshdi. Bu haqda viloyat hokimligida bo‘lib o‘tgan matbuot anjumani davomida “Hududgaz Namangan” MChJ direktori o‘rinbosari O‘tkirbek Mamadaliyev ma’lum qildi, deya xabar beradi “Daryo” muxbiri Azizbek Abduvaliyev.

Bu ko‘rsatkich joriy yil 6-noyabrdan to 2-dekabrga qadar 0,2 atmosferani tashkil qilib, belgilangan ko‘rsatkichdan 15 barobar kam bo‘lgan va aholi noroziligiga sabab bo‘lgan.

O‘tkir Mamadaliyevga ko‘ra, gaz taqsimlash stansiyalaridan chiqish bosimi 1 atmosferaga yetkazilgan, bu ko‘rsatkichni 3 atmosferadan oshirishga harakat qilinmoqda.

Namanganda avtomobillarga gaz quyish shoxobchalarida yuzaga kelayotgan uzilishlar yuzasidan izoh bergan mutasaddi gaz ta’minotida birlamchi iste’molchilar ko‘p qavatli uylarda yashovchilar hamda ijtimoiy obyektlar ekani, shu sababdan viloyatdagi mavjud 83 ta AGQShga 10 soatlik — soat 19:00 dan 5:00 gacha cheklov qo‘yishga to‘g‘ri kelganini qayd etib, gaz bosimi ortishi bilan bu cheklovlar ham bekor qilinishini bildirdi.

Ma’lumot uchun, haydovchilarning ta’kidlashishcha, 3-dekabr, seshanba kunidan Namangan shahridagi gaz quyish shoxobchalarida turnaqator navbatlar kamaygan.