Kuvayt O‘zbekistondagi urologik yordam ko‘rsatuvchi muassasalarni jihozlash uchun kredit ajratadi
O‘zbekistondagi urologik yordam ko‘rsatuvchi muassasalar Kuvayt krediti hisobidan jihozlanadi. Bu jamoatchilik muhokamasiga qo‘yilgan “Kuvayt arab iqtisodiy rivojlanish jamg‘armasi ishtirokida urologik va gemodializ yordamini ko‘rsatuvchi O‘zbekiston tibbiy muassasalarini jihozlash loyihasini amalga oshirish to‘g‘risida”gi hukumat qarori loyihasida ko‘zda tutilgan.
Qayd etilishicha, “Urologik va gemodializ yordamini ko‘rsatuvchi O‘zbekiston Respublikasi tibbiy muassasalarini jihozlash” loyihasini amalga oshirish uchun to‘rt yillik imtiyozli davr bilan 2016-yil 15-martda O‘zbekiston va Quvayt arab iqtisodiy rivojlanish jamg‘armasi o‘rtasida 26 yil muddatga 23,1 million dollarlik kredit shartnomasi imzolangan.
O‘zbekistonning mazkur loyihani amalga oshirishga qo‘shgan hissasi 5,97 million AQSh dollari ekvivalentida, shu jumladan, 4,41 million AQSh dollari ekvivalentida soliq va bojxona imtiyozlarini taqdim etish tarzida tashkil etadi.
Loyiha uch yilga mo‘ljallangan.
O‘zbekiston Sog‘liqni saqlash vazirligi kreditdan maqsadli foydalanish va loyihani samarali amalga oshirish uchun mas’ul bo‘lgan ijro etuvchi agentlik hisoblanadi.
Loyihani amalga oshirish doirasida tuzilgan shartnomalar bo‘yicha kontragent Sog‘liqni saqlash vazirligi huzuridagi “O‘zmedimpeks” davlat unitar korxonasi hisoblanadi.
