Braziliyadan Turkiyaga kokain yetkazmoqchi bo‘lgan qozog‘istonliklar 15 yilga qamaldi

Qozog‘istonning ikki fuqarosi Braziliyadan kokain olib kelib kontrabanda bilan shug‘ullangani uchun 15 yilu 5 oyga ozodlikdan mahrum qilindi. Bu haqda Qozog‘iston milliy xavfsizlik qo‘mitasining axborot xizmati xabar berdi, deb yozmoqda “RIA Novosti”.

Xabarga ko‘ra, xalqaro kanal Braziliyadan olingan kokainni BAA orqali Qozog‘istonga, so‘ngra Turkiyaga yuborilayotgan vaqtda 2019-yil mart oyida fosh etilgan. Olmaota aeroportida Dubay aviareysi yo‘lovchisi bo‘lgan qozog‘istonlik M.Sotiboldiyev qo‘lgan olingan.

Tekshiruv vaqtida fuqaroning oshqozon ichak traktida 42 ta kapsuladagi og‘irligi 460 gramm bo‘lgan kokain borligi aniqlangan.

Keyinroq huquq-tartibot organlari xodimlari kokain partiyasini Braziliyadan Qozog‘istonga olib kelib so‘ngra Turkiyaga yetkazmoqchi bo‘lgan gumonlanuvchining qarindoshi Kurmanboyevani ham hibsga olgan.

“Olmoata shahridagi jinoyat ishlari bo‘yicha tumanlararo maxsus sudining qarori bilan L.Kurmanboyeva hamda M.Sotiboldiyev aybdor deb topilib, ularning har biri 15 yilu 5 oyga ozodlikdan mahrum qilindi. Mahkumlar jazoni kuchaytirilgan tartibli koliniyalarda o‘taydi”, — deyilgan xabarda.