Toshkentda ilk marta Turkiy kengashning biznes forumi o‘tkaziladi
3-oktabr kuni Turkiy tilli davlatlar hamkorlik kengashining Bosh kotibi Bog‘dod Amreyev O‘zbekistonga tashrif buyurdi. Bu haqda Tashqi ishlar vazirligi xabar berdi.
6-oktabrga qadar davom etadigan tashrif doirasida Bog‘dod Amreyev O‘zbekiston Tashqi ishlar vazirligi, Investitsiyalar va tashqi savdo vazirligi va Savdo-sanoat palatasida uchrashuvlar o‘tkazadi. O‘zbekistonda birinchi marta bo‘lib o‘tadigan TTDHKning Ishbilarmonlar kengashi majlisida va O‘zbekiston, Ozarbayjon, Vengriya, Qozog‘iston, Qirg‘iziston va Turkiya tadbirkorlari ishtirokidagi Investitsion biznes forumida ishtirok etadi. Bog‘dod Amreyevga TTDHK kotibiyati delegatsiyasi hamrohlik qiladi.
Ta’kidlash kerakki, Turkiy olam Ishbilarmonlar kengashi majlisi va biznes forumi Toshkent shahrida Investitsiyalar va tashqi savdo vazirligi va Savdo-sanoat palatasi bilan birgalikda O‘zbekistonning Anqara shahridagi elchixonasining faol ko‘magida o‘tkazilmoqda.
