Normativ-huquqiy hujjatlar muhokamasi portaliga Vazirlar Mahkamasining jismoniy va yuridik shaxslarning mulkiy huquqi kafolatlanishini ta’minlash bo‘yicha qo‘shimcha chora-tadbirlar to‘g‘risidagi qarori loyihasi joylashtirildi.
Qaror loyihasiga ko‘ra, yer uchastkasi yoki uning bir qismini davlat va jamiyat ehtiyojlari uchun olib qo‘yilishi faqat mulk egasi yoki doimiy foydalanuvchi roziligi bilan xalq deputatlari kengashi qarori yoki Prezident va hukumat qarori bilan amalga oshirilishi mumkin.
Qoraqalpog‘iston Vazirlar kengashi, viloyatlar va Toshkent shahri yoki tuman-shahar hokimliklarining olib qo‘yilayotgan yer uchastkalaridagi ko‘chmas mulk obyektlarini buzish to‘g‘risida qaror qabul qilishi adliya organlarining huquqiy ekspertizasidan so‘ng ijobiy xulosa mavjud bo‘lgandagina yo‘l qo‘yiladi.
Yer uchastkasi olib qo‘yilishi tashabbuskori va ko‘chmas mulk egasi o‘rtasida tuziladigan kelishuv majburiy tarzda notarial tasdiqdan o‘tishi lozim. Buning uchun boj to‘lovi tashabbuskor tomonidan to‘lanadi.
Hujjat loyihasida ko‘chmas mulk obyekti buzilishi haqidagi qaror faqat uning egasiga to‘liq kompensatsiya taqdim etilganidan so‘ng qabul qilinishi belgilab qo‘yilmoqda.
Izoh (0)