Oliy va o‘rta maxsus ta’lim vazirligi taklifi bilan Times Higher Education (THE) xalqaro reyting agentligi yetakchi eksperti Nikola Xorsman va strategik mahsulotlar va qarorlar bo‘yicha direktori Maykl Karuana O‘zbekistonga tashrif buyurdi. Bu haqda Oliy va o‘rta maxsus ta’lim vazirligi matbuot xizmati xabar qiladi.

Foto: Google Images

2019-yil 28-avgust kuni vazirlikda tashkil qilingan videoseminarda xorijlik ekspertlar mamlakatdagi yetakchi universitetlar rektorlari va prorektorlariga THE World University Rankings dunyoning kuchli universitetlari metodologiyasini atroflicha sharhlab berdi, THE DataPoint axborot-tahliliy servisi imkoniyatlaridan benchmarking maqsadlarida foydalanish yo‘llari bilan tanishtirdi.

Nikola Xorsman va Maykl Karuana O‘zbekistondagi nufuzli universitetlar faoliyatini xalqaro reyting agentliklari metodologiyasi asosida 13 ta indikator yordamida tahlil qildi hamda dunyoning kuchli universitetlari ro‘yxatiga kirish uchun qilinishi lozim bo‘lgan masalalar yuzasidan zarur tavsiyalarni berdi.

Ma’lumot uchun, 2019-yil 27-fevral kuni “Ilm-fan—2020” milliy rivojlanish dasturi doirasida Oliy va o‘rta maxsus ta’lim vazirligi hamda Times Higher Education o‘rtasida mahalliy OTMlarni xalqaro reytingga kirishini qo‘llab-quvvatlash bo‘yicha strategik bitim imzolangan va 2019—2021-yillarga mo‘ljallangan harakatlar rejasi ishlab chiqilgan.