AQSh Turkiyaga Patriot raketa kompleksini sotishdan rasman bosh tortdi

AQSh Patriot raketaga qarshi kompleksini sotish bo‘yicha Turkiyaga qilingan taklifi bo‘yicha rasman munosabat bildirdi. Bu haqda “RBK” xabar berdi.

“Rossiyaning S-400 tizimini sotib oladigan bo‘lsa, Patriot bo‘yicha taklifimiz o‘z kuchini yo‘qotishi haqida Turkiyani muntazam ogohlantirib kelganmiz. Patriot borasidagi taklifimiz muddati tugadi”, — degan AQSh Davlat departamenti mansabdor shaxslaridan biri.

Eslatib o‘tamiz, Turkiyaga qiymati 2,5 milliard dollarlik S-400 to‘rtta raketa tizimini yetkazib berish to‘g‘risidagi bitim 2017-yilning iyul oyida imzolangan. Ular 2020-yilning mart oyida keltirilishi kutilayotgan edi, lekin keyinroq Anqara va Moskva bu jarayonni tezlashtirib, AQSh noroziliklariga qaramasdan, tizimning dastlabki partiyasi 12-iyul kuni Anqaraga yetkazilgan. Ikkinchi partiyasini yetkazish esa avgust—sentabr oylariga mo‘ljallangan.