8-avgustning e’tiborga molik yangiliklari — “Daryo” dayjestida.
Qirg‘iziston sobiq prezidenti Almazbek Atambayev bir necha soat davom etgan harbiy operatsiyadan so‘ng huquq-tartibot organlari xodimlariga taslim bo‘ldi. U Qirg‘iziston IIV tergov bosh boshqarmasiga olib kelindi.
U o‘z qarorgohi hududidan kuchishlatar tuzilmalar xodimlari tomonidan olib chiqib ketildi. Qayd etilishicha, yo‘llar yopiqligi bois Atambayev Issiq-Ota tumani orqali olib ketilgan
***
O‘zbekiston Axborot va ommaviy kommunikatsiyalar agentligi direktori o‘rinbosari Saida Mirziyoyeva Facebook ijtimoiy tarmog‘idagi sahifasiga singlisining suratini qo‘yib, uni tug‘ilgan kuni bilan tabrikladi.
“Mening go‘zal singlim, Shahnozam! Sen biz uchun har doim jajji, sevimli singilchamiz bo‘lib qolasan! Tug‘ilgan kuning bilan! Senga baxt-saodat va sihat-salomatlik tilayman! Men doim yoningdaman. Seni juda yaxshi ko‘raman”, — deyiladi surat ostiga qoldirilgan izohda.
***
UzAvto Motors zavodi profilaktika ishlari tufayli avtomobil ishlab chiqarishni to‘xtatmoqda.
Ish rejasiga muvofiq, UzAvto Motors AJ zavodlarida 2019-yilning 26-avgustidan boshlab yillik rejali profilaktika ishlari boshlanadi.
Ushbu chora-tadbirlar doirasida korxonalarni kuz-qish mavsumiga tayyorlash doirasida rejali tekshirish, asosiy va yordamchi texnologik uskunalar va butlovchi qismlar, kommunal va rejali ta’mirlash ishlari olib boriladi.
UzAvto Motors 2019-yilning 23-sentabridan yana avtomobil ishlab chiqarishni boshlaydi.
***
Sinoptiklar xabariga ko‘ra, O‘zbekistonda nihoyat salqin havo kuzatiladi.
Qayd etilishicha, 9-avgustdan havo harorati 41 daraja issiqdan 36 darajagacha tushadi. Kechasi harorat atigi 21 darajani tashkil etadi.
***
8-avgust, payshanba kuni mulla Abdulg‘ani Bardar boshchiligidagi “Tolibon” delegatsiyasi O‘zbekistonga keldi. Bu haqda “Tolibon”ning Dohadagi siyosiy ofisi rasmiy vakili Suhayl Shaxin ma’lum qildi.
Tashqi ishlar vazirligida “Tolibon” harakatining Doha shahridagi siyosiy ofisi rahbari mulla Barodar Axund boshchiligidagi Harakat vakillari bilan uchrashuv bo‘lib o‘tdi.
Uchrashuv chog‘ida Afg‘onistonda barqaror va uzoq muddatli tinchlikka erishish maqsadida mamlakatda tinch siyosiy jarayonlarni ilgari surish bilan bog‘liq masalalar muhokama qilindi.
***
Axborot va ommaviy kommunikatsiyalar agentligi rahbari Komil Allamjonov agentlik tasarrufidagi “O‘zbekiston” nashriyot-matbaa ijodiy uyi xodimlari istiqomat qilayotgan 17-B uyda yashayotgan odamlar bilan muloqot qilib, ularning yashash tarzi bilan tanishdi.
Uning ma’lum qilishicha, “O‘zbekiston” nashriyoti xodimlari 30 yil o‘tib yashayotgan uylariga egalik hujjatlarini olgan.
“Mazkur korxonada uzoq yillardan buyon mehnat qilib, o‘z tajribasini yosh avlodga o‘rgatib kelayotgan faxriylarimiz ham bor. Hatto bir xodimimiz shu dargohda faoliyat boshlaganidan buyon farzand katta qilib, yaqinda qiz chiqarayotgan ekan. Butun jamoa oilaviy ahil va bordi-keldi qilar ekan. Ularni hozirga qadar bitta dard bezovta qilib kelar edi — ushbu xonadonlar ularga qarashli emas edi. Uy o‘zingniki bo‘lmaganidan keyin xalovat topmay, xavotir va hadik ichida yashashni tassavur qilib ko‘ring. Aytish kerakki, mazkur uy 1988-yilda foydalanishga topshirilgan. Odamlar o‘ttiz yildan ortiq vaqt mobaynida shu uy o‘z mulkiga aylanishini orzu qilib, kutib yashadi”, — deb yozadi u.