Qishda “svet” qancha o‘chadi? “Hududiy elektr tarmoqlari” jamiyatida aniq javob yo‘q
Qish mavsumida elektr energiyasida kuzatiladigan uzilishlar bo‘yicha aniq prognozlar qilish mushkul. Bu haqda “Hududiy elektr tarmoqlari” AJ boshqaruv raisi o‘rinbosari Feruz Qurbonov jurnalistlar bilan bo‘lib o‘tgan ochiq muloqotda aytib o‘tdi, deya xabar bermoqda, “Daryo” muxbiri Musulmonbek Ibrohimov.
Jamiyat raisi o‘rinbosarining ta’kidlashicha, ayni vaqtda kelayotgan qish mavsumida elektr energiyasida uzilishlar bo‘lmaydi, deb aytish qiyin. Uskunalar eskirgan. 2019-yil uchta elektr stansiyasi ishga tushsa, yetishmovchiliklarning bir muncha oldi olinadi.
“O‘tgan yili elektr energiyasiga talab 8700 megavatt bo‘lgan bo‘lsa, joriy yil bu talab 9 ming megavattga yetdi. Elektr energiya bir vaqtda ishlab chiqarilib, o‘sha onda iste’mol qilingani uchun iste’molchilardan kim uyida konditsioner yoqishi yoki qaysi korxona qo‘shimcha uskunani ishga tushirishini bilmaguncha, qanchalik darajada o‘chishlar bo‘lishini aytolmayman. Uzilishlar vaqtini aniq bilish qiyinroq”, — dedi Qurbonov.
Energetika vazirligi boshqarma boshlig‘i Ilhom Ne’matullayevning aytishicha, qish mavsumi sovuq kelsa, uzilishlar bo‘ladi: “Havo sovib ketsa, ko‘pchilik aholi isitish moslamalaridan foydalanadi. Shunda elektr energiyada uzilish bo‘lishi mumkin”, — dedi u. Selsiy bo‘yicha sovuq harorat aynan necha gradus bo‘lganda uzilishlar bo‘ladi, degan savolga Ne’matullayev javob berolmadi.
Avvalroq, 9-iyun kuni Andijon viloyat hokimligida o‘tgan yig‘ilishda hokim Shuhratbek Abdurahmonov Energetika vazirining viloyatga qancha elektr energiya kerakligini bilmasligidan taajjublanib, “Shunga aqli yetmayapti bu farosati yo‘qlarning. Yo aqli yetmayapti, yo atay qilyapti”, — degan edi.
