TATU talabasining qotili bo‘lib chiqqan yaqin qarindoshi, Toshkentda kanalga qulagan Spark, Gulnora Karimovaning pullarini qaytarishni to‘xtatgan Shveysariya va kunning boshqa xabarlari
4-iyulning e’tiborga molik yangiliklari — “Daryo” dayjestida.
O‘z uyida o‘ldirib ketilgan TATU talabasining qotili sifatida uning yaqin qarindoshi qo‘lga olindi.
Aniqlanishicha, A.Sharobiddinovni yaqin qarindoshi, voyaga yetmagan R.G. o‘zaro kelib chiqqan janjal negizida oshxona pichog‘i bilan urib, tan jarohati yetkazib, o‘ldirgan.
***
Toshkentda Spark haydab ketayotgan ayol hushini yo‘qotib, “Bo‘zsuv” kanaliga quladi.
Ma’lum bo‘lishicha, hodisaga uning to‘satdan hushidan ketishi sabab bo‘lgan. Oqibatda 12 metr balandlikdan chuqurligi 5 metr bo‘lgan “Bo‘zsuv” kanaliga qulagan. Mashina suvga to‘lgan. Ayol darz ketgan old oyna orqali chiqishga muvaffaq bo‘lgan.
***
Gulnora Karimovaning advokati: Shveysariya O‘zbekistonga 555 mln dollar qaytarishni to‘xtatib qo‘ydi.
“Shveysariya federal sudidagi uchinchi yirik g‘alaba. 555 million dollarni qaytarish darhol to‘xtatildi. O‘zbekiston bizning mijozimizni qamoqda saqlashni to‘xtatmas ekan, hamkorlik bo‘lmaydi. Unga yanada ko‘proq bosim o‘tkazishmoqda. Karimovaning hayoti xavf ostida”, — deb yozadi Manja.
***
Toshkentda yangi qurilayotgan uy alanga oldi.
4-iyul kuni soat 06.33 da Yakkasaroy tumani, Mirobod ko‘chasi, 35-uy qarshisida yangi qurilayotgan uyning yerto‘lasida 40 kvadrat metr maydonda penoplast bo‘laklari yongan.
***
Koinot paydo bo‘lishining butun tarixi 10 daqiqalik videoda ko‘rsatib berildi.
Rolikning har bir soniyasi 22 million yilni o‘z ichiga oladi. Bunday masshtablashtirishda Quyosh va Quyosh tizimi filmning to‘rtinchi daqiqasidagina paydo bo‘ladi, butun insoniyat tarixi esa bir soniyadan kamroq vaqtni oladi. “Bu Koinotimiz qanchalik ulug‘vor yoshda, o‘zimiz esa qanchalik yosh ekanligimizni tushunish imkonini beradi”, — deydi muallif.
