Saudiya Arabistonining “Al-Hilol” klubi Italiya A Seriyasining ikki futbolchisi — “Napoli” hujumchisi Viktor Osimhen va “Milan” himoyachisi Teo Ernandesni o‘z safiga qo‘shib olish uchun takliflarini yaxshilagan. Bu haqda taniqli insayder Nikolo Skira o‘zining X (avvalgi Twitter) ijtimoiy tarmog‘idagi sahifasida ma’lum qildi.
Manbaga ko‘ra, “Al-Hilol” rahbariyati har ikki futbolchini imkon qadar tezroq jamoaga olib kelishni rejalashtirmoqda. Hozirda tomonlar o‘rtasida muzokaralar davom etmoqda.
Avvalroq OAVda “Al-Hilol” Osimhenga yiliga 50 million yevro miqdorida maosh taklif qilgani haqida xabarlar tarqalgan edi. Bungacha 26 yoshli nigeriyalik futbolchi yiliga 30 million yevro taklif qilingan dastlabki variantni rad etgani aytilgan. Shuningdek, klub uning “Napoli” bilan amaldagi shartnomasini bekor qilish uchun 75 million yevro miqdorida tovon puli to‘lashga tayyorligini bildirgan.
Teo Ernandes borasida “Milan” va “Al-Hilol” 30 million yevro evaziga kelishuvga erishgani, qo‘shimcha ravishda 5 million yevro bonus tarzida to‘lanishi mumkinligi haqida ma’lumotlar tarqalgan. Biroq keyinchalik bu kelishuv rasman tasdiqlanmagani va futbolchining transferga hozircha rozilik bermagani ma’lum qilindi.
Izoh (0)