“Innovatsion g‘oyalar yetakchisi” ko‘krak nishoniga nomzodlar soni qariyb 500 ga yetdi

Tuman (shahar) hokimliklarida va oliy ta’lim muassasalarida tuzilgan komissiyalarga hozirgi kunda jami 468 nafar nomzod “Innovatsion g‘oyalar yetakchisi” ko‘krak nishoni uchun hujjat topshirdi. Bu haqda Innovatsion rivojlanish vazirligi ma’lumotiga tayanib, Spot xabar berdi.

Ushbu ko‘krak nishoni innovatsion g‘oya va texnologiyalarni rivojlantirish va ularni amaliyotga tatbiq etishga munosib hissa qo‘shgan yosh olimlar va talabalar hamda tashabbuskor fuqarolarning innovatsion faoliyatini rag‘batlantirish va erishgan yutuqlarini munosib taqdirlash maqsadida beriladi.

Ko‘krak nishoni bilan taqdirlashga oid dastlabki takliflarni qabul qilish bo‘yicha 1-apreldan 30-aprelgacha respublikaning barcha tuman hokimliklarida va oliy ta’lim muassasalarida qabul komissiyalar tuzilgan.

Qoraqalpog‘iston Vazirlar Kengashi, viloyatlar va Toshkent shahar hokimliklari taqdim etilgan takliflarni mazkur hudud yoki respublika iqtisodiyoti tarmoqlari va ijtimoiy soha ehtiyojlaridan kelib chiqib, innovatsion g‘oya va texnologiyalarni ushbu hududga yoki respublika iqtisodiyotiga tatbiq etish darajasini hisobga olgan holda o‘rganib chiqadi.

Shundan so‘ng 3 nafardan tavsiya qilingan nomzodlarning hujjatlarini 20-iyungacha Innovatsion rivojlanish vazirligiga taqdim etadi.