O‘zbekistonda Britaniyaning Crown Agents kompaniyasi bilan soxta dorilarni haqiqiysidan ajratuvchi mobil dasturni ishga tushirish yuzasidan muzokaralar olib borilmoqda. Bu haqda Innovatsion sog‘liqni saqlash milliy palatasi matbuot xizmati xabar berdi.
Bunday tizimning ishlash tamoyili ko‘pchilikka tanish. Telefon shtrixkodga yo‘naltiriladi hamda ishlab chiqaruvchi, sertifikatlash va dori ishlab chiqarilgan sana haqida ma’lumot olinadi. Hech qanday ma’lumot bo‘lmasa, demak dori soxta.
Crown Agents agentligining Markaziy Osiyo bo‘yicha mintaqaviy menejeri Larisa Kokarevaning ta’kidlashicha, innovatsion tizim birinchi navbatda tibbiy preparatlarni kuzatish imkonini beradi. Hozirda bunday tizim Birlashgan Arab Amirliklarida amalga oshirilmoqda va u birinchi bo‘lishi mumkin. O‘zbekiston ham ushbu tizimga ega bo‘lgan birinchi davlatlardan biri bo‘lishi mumkin.
“Ushbu tizim mutlaq yangilik bo‘lib, u yakuniy holatida endi amalga oshiriladi. O‘zbekiston ushbu texnologiyani joriy etgan mintaqadagi birinchi mamlakat bo‘lishi mumkin. Bu loyiha, albatta, O‘zbekiston uchun juda muhim, chunki bu mamlakatda tibbiyot, sog‘liqni saqlash va raqamli texnologiyalarni tibbiyotga joriy etishda katta yutuq bo‘ladi”, — deydi Larisa Kokareva.
Ekspertning fikriga ko‘ra, tibbiy preparatlarni nazorat qilishga qaratilgan tizim, birinchi navbatda, O‘zbekistonda qonuniy dori vositalari ishlab chiqarishga yo‘l ochadi va “qora bozor” dorilariga to‘siq qo‘yadi. Bu esa aholi sog‘lig‘i uchun juda katta foyda keltiradi.
Izoh (0)