Mudofaa vazirligi Toshkent shahar IIBB bilan hamkorlikda Ichki ishlar vazirligining faxriy general-mayori Islom Sattorov xotirasiga bag‘ishlangan “Varraklar festivali”ni o‘tkazdi. Bu haqda “Daryo”ga vazirlik matbuot xizmati xabar berdi.
Poytaxtning Mirzo Ulug‘bek tumanidagi 222- umumta’lim maktabida 4-marotaba o‘tkazilayotgan ushbu musobaqadan ko‘zlangan maqsad bolalar va o‘smirlar o‘rtasida jinoyatchilikning oldini olish, ularni sog‘lom hayotga targ‘ib qilish, milliy o‘yinlarni ommalashtirishdan iborat.
Unda jami 1200 dan ortiq kishi — maktab o‘quvchilari, harbiylar, mahalla ahli ishtirok etdi.
Tadbir davomida Mudofaa vazirligi harbiy xizmatchilari hamda o‘quvchilar tomonidan tayyorlangan qo‘l jangi sahnalari, harbiy orkestr ijrosidagi kuy-qo‘shiqlar bolalarga zavq bag‘ishladi.
Festival doirasida ochiq osmon ostida o‘tkazilgan varrak uchirish musobaqasi 5 yoshdan 14 yoshgacha bo‘lgan bolalar va o‘smirlar o‘rtasida kechdi. Tashkilotchilar tomonidan faol qatnashchilarga diplom va sovg‘alar, eng yaxshi ishtirokchiga esa velosiped taqdim qilindi.
Izoh (0)