Termiz arxeologiya muzeyida “Surxon vohasi — baxshichilik diyori” nomli ko‘rgazmasining ochilish marosimi bo‘lib o‘tdi. Bu haqda O‘zbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligi xabar berdi.
Ko‘rgazmada O‘zbekiston xalq baxshilari, baxshichilik san’ati rivojiga munosib hissa qo‘shib kelayotgan dostonchilik maktabi vakillari va OAV xodimlari ishtirok etgan.
Ko‘rgazmaning tantanali ochilish marosimida so‘zga chiqqanlar bugungi kunda xalq og‘zaki ijodining eng yorqin hamda noyob namunalari, milliy folklorning asl durdonalari qayta tiklanayotganligi hamda Prezident Shavkat Mirziyoyevning 2018-yil 1-noyabrda qabul qilingan “Xalqaro baxshichilik san’ati festivalini o‘tkazish to‘g‘risida”gi qarorida belgilanganidek, baxshichilik va dostonchilik san’atini, baxshilar faoliyati, ijodini bevosita ko‘rgazmalar asosida namoyish va targ‘ib etish maqsadida tashkil etilganligi e’tirof etgan.
O‘tkazilgan tadbirda el suygan baxshi-shoirlar tomonidan dostonlardan parchalar ijro etilgan.
Shundan so‘ng tadbir ishtirokchilari xalq og‘zaki ijodining qadimiy namunalarini tiklash va milliy qadriyatlarni rivojlantirishga munosib hissa qo‘shgan baxshilarning milliy kiyimlari, do‘mbiralari va bir qator noyob buyumlar hamda baxshi-shoirlar ijodi va faoliyatiga doir qiziqarli ma’lumotlar ko‘rgazmasi bilan yaqindan tanishgan.
“Yurtingizdagi ko‘plab tadbirda ishtirok etib kelmoqdaman. Ushbu ko‘rgazmada ishtirok etganimdan xursandman, — deydi Afg‘oniston fuqarolarini o‘qitish ta’lim markazi talabasi, Ra’no Sherzod. — Avvalambor, men afg‘on farzandlari yaxshi ta’lim olish uchun keng imkoniyatlarni yaratib bergan O‘zbekiston Respublikasi Prezidenti Shavkat Mirziyoyevga minnatdorchilik bildiraman. O‘tkaziladigan festival haqida gapiradigan bo‘lsam, afg‘on yoshlari ham uni intiqlik bilan kutyapti. Festival taassurotlarini yurtimiz yoshlariga ham ulashish niyatidaman”.
Ko‘rgazma 10-aprelgacha davom etadi.
Izoh (0)