O‘zbekistonda 2025-yilning yanvar–iyun oylarida 23 558 ta o‘tkir yuqumli ichak kasalligi holati qayd etildi. Bu haqda Sanitariya-epidemiologik osoyishtalik va jamoat salomatligi qo‘mitasi axborot xizmati AOKAda o‘tkazilgan brifingda ma’lum qildi.
Eng ko‘p kasallanish holatlari Toshkent shahri, Qashqadaryo, Sirdaryo viloyatlari hamda Qoraqalpog‘iston Respublikasida kuzatilgan.
Ma’lumotlarga qaraganda, ichak infeksiyasi eng ko‘p kichik yoshdagi bolalar orasida qayd etilgan. Jumladan,
- 1 yoshgacha bo‘lgan bolalar orasida 5 mingdan ortiq;
- 1 yoshdan 3 yoshgacha bo‘lgan bolalarda 7678 nafar;
- 4–6 yosh oralig‘ida 3184 nafar;
- 7–14 yoshdagi bolalarda esa 1998 nafar;
- 15–19 yoshdagi o‘smirlar orasida 756 nafar;
- 20 va undan katta yoshdagi fuqarolar orasida esa 4938 nafar bemor aniqlangan.
Kasallikka nima sabab bo‘ladi?
Mutaxassislarning fikricha, o‘tkir yuqumli ichak kasalliklari ayniqsa yoz oylarida ko‘proq uchraydi. Bunga bir nechta omillar sabab bo‘lmoqda. Jumladan, yaxshi saqlanmagan yoki uzoq vaqt turgan ovqatlarni iste’mol qilish, bolalar uchun mo‘ljallangan sun’iy ovqatlarni tayyorlashda gigiyena qoidalariga rioya qilinmasligi, yuvilmagan ho‘l mevalarni iste’mol qilish, ochiq suv havzalarida cho‘milish vaqtida mikroblarning organizmga tushishi hamda ushbu kasallik bilan og‘rigan bemorlar bilan muloqotda bo‘lish infeksiyaning tarqalish xavfini oshiradi.
Shuningdek, sifati kafolatlanmagan, nosanitariya sharoitida tayyorlangan va sotilayotgan ovqatlar, salqin ichimliklar, sharbatlar, ayran va boshqa mahsulotlarni iste’mol qilish ham o‘tkir ichak infeksiyalarining tarqalishiga sabab bo‘lishi mumkin.
Sanepidqo‘mita ushbu kasallikni oldini olish uchun qaynatilgan suv ichishni va oziq-ovqat mahsulotlarini yuvib isteʼmol qilish, hamda shaxsiy gigiyena qoidalariga puxta amal qilishni tavsiya qilgan.
Jahon sog‘liqni saqlash tashkiloti (JSST) ma’lumotlariga ko‘ra, har yili dunyo bo‘yicha 1 milliarddan ortiq kishi diareya bilan kasallanadi, ulardan 5–10 million nafari vafot etadi.
Izoh (0)