Xotin-qizlar qo‘mitasi va Oliy sud hamkorlikda Zangiota tumanida joylashgan jazoni ijro etish muassalarida jazo muddatini o‘tayotgan mahkuma ayollar bilan ochiq muloqot o‘tkazdi, deya xabar beradi Xotin-qizlar qo‘mitasi matbuot xizmati.
Muloqot jarayonida mahkuma ayollarning muammolari tinglandi hamda 15 nafar jazo o‘tayotgan ayolning arizalari qabul qilindi.
19-mart kuni Oliy sudning jinoyat ishlari bo‘yicha sudlov hay’ati hamda jinoyat ishlari bo‘yicha Zangiota tumani sudining ayollar jazoni ijro etish muassasasi va manzilli koloniyada sayyor sud majlislari bo‘lib o‘tdi. Besh nafar jazo o‘tayotgan ayolning ishi Oliy sud tomonidan nazorat tartibida ko‘rib chiqilib, ularning sodir etgan qilmishidan chin ko‘ngildan pushaymonligi, ahloqan tuzalish yo‘liga o‘tganligi hamda jazoning asosiy qismini o‘taganligi hisobga olinib, jazodan ozod qilindi. Jinoyat ishlari bo‘yicha Zangiota tuman sudi tomonidan yana besh nafar ayol jazoni ijro etish muassasasidan muddatidan ilgari shartli ozod qilindi.
Shuningdek, ahloq tuzatish ishi jazosini ozodlikdan mahrum qilish jazosiga almashtirish haqidagi sud qarorlari bekor qilinib, ikki nafar ayol oilasi bag‘riga qaytarildi.
Bundan tashqari, manzilli koloniyada jazo o‘tayotgan besh nafar ayol ham jazodan ozod etildi.
Umuman olganda bayram oldidan 17 nafar ayol Navro‘z ayyomini oilasi bag‘rida kutib olish baxtiga muyassar bo‘ldi.
Izoh (0)