Хотин-қизлар қўмитаси ва Олий суд ҳамкорликда Зангиота туманида жойлашган жазони ижро этиш муассаларида жазо муддатини ўтаётган маҳкума аёллар билан очиқ мулоқот ўтказди, дея хабар беради Хотин-қизлар қўмитаси матбуот хизмати.

Мулоқот жараёнида маҳкума аёлларнинг муаммолари тингланди ҳамда 15 нафар жазо ўтаётган аёлнинг аризалари қабул қилинди.

19 март куни Олий суднинг жиноят ишлари бўйича судлов ҳайъати ҳамда жиноят ишлари бўйича Зангиота тумани судининг аёллар жазони ижро этиш муассасаси ва манзилли колонияда сайёр суд мажлислари бўлиб ўтди. Беш нафар жазо ўтаётган аёлнинг иши Олий суд томонидан назорат тартибида кўриб чиқилиб, уларнинг содир этган қилмишидан чин кўнгилдан пушаймонлиги, аҳлоқан тузалиш йўлига ўтганлиги ҳамда жазонинг асосий қисмини ўтаганлиги ҳисобга олиниб, жазодан озод қилинди. Жиноят ишлари бўйича Зангиота туман суди томонидан яна беш нафар аёл жазони ижро этиш муассасасидан муддатидан илгари шартли озод қилинди.

Шунингдек, аҳлоқ тузатиш иши жазосини озодликдан маҳрум қилиш жазосига алмаштириш ҳақидаги суд қарорлари бекор қилиниб, икки нафар аёл оиласи бағрига қайтарилди.

Бундан ташқари, манзилли колонияда жазо ўтаётган беш нафар аёл ҳам жазодан озод этилди.

Умуман олганда байрам олдидан 17 нафар аёл Наврўз айёмини оиласи бағрида кутиб олиш бахтига муяссар бўлди.