Efiopiyada halokatga uchragan Boeing 737 MAX samolyoti uchuvchisi dispetcherga parvozni boshqarish tizimida muammolar borligini va u aeroportga qaytishi kerakligini aytgan. Bu haqda TJournal xabar berdi.
Ethiopian Airlines direktori Tevolde Gebremariam dispetcher va uchuvchining suhbati yozilgan audioni eshitganini aytgan. U, shuningdek, uchuvchi boshqa tashqi muammolar haqida xabar bermaganini ham qo‘shib qo‘ygan.
Gebremariamning aytishicha, samolyotning qora qutilari o‘rganish uchun Yevropaga keltiriladi. Ammo qaysi mamlakat uni tahlil qilishi hali noma’lum.
The New York Times gazetasining yozishicha, 2018-yilda kamida ikkita AQSh ekipaji Boeing 737 MAX 8 avtopilotidagi muammolar haqida xabar bergan.
“Ularning samolyoti avtopilot rejimga o‘tganidan keyin to‘satdan ‘sho‘ng‘iy’ boshlagan”, — deydi jurnalistlar.
Uchuvchilar boshqaruv rejimiga o‘tgach, yo‘qotilgan balandlikka yana ko‘tarilib olgan.
Eslatib o‘tamiz, samolyot 10-mart kuni tongda Efiopiyaning Debre-Zeyt shahri yaqinida halokatga uchragan. 11-mart kuni qora quti topilgan edi. U haqidagi tasvirlar Efiopiya telekanallari orqali yoritilgan. Samolyotdagi 157 nafar yo‘lovchining hech biri omon qolmagan. Unda 30 dan ortiq mamlakatlar fuqarolari bo‘lgan.
Ushbu modeldagi samolyot bilan ikkinchi baxtsiz voqea 2018-yilda Indoneziyada sodir bo‘lgan: Boeing 737 MAX 8 samolyotining qulashi oqibatida 188 kishi halok bo‘lgan. 13-mart kuni OAVning xabar berishicha, Rossiya o‘z hududi bo‘ylab Boeing 737 MAX 8 samolyotlarining parvoz qilishini taqiqlamaydi, biroq S7 ushbu samolyotlar faoliyatini to‘xtatgan yagona kompaniya.
Izoh (0)