Davlat xavfsizlik xizmati tomonidan olib borilgan tezkor tadbirlar natijasida giyohvandlik vositalari savdosi bilan shug‘ullanuvchi shaxslar faoliyatiga chek qo‘yildi. Bu haqda O‘zA xabar bermoqda.
Jumladan, “Toshkent—Buxoro” yo‘nalishida harakatlanib kelayotgan fuqaro Laziz Mustafoyevga tegishli Lacetti avtomashinasi G‘ijduvon tumanidagi “Sarmijon” nazorat postida to‘xtatilib, ko‘zdan kechirilganda, mashinaning orqa o‘rindig‘ida giyohvandlik vositalari toifasiga kiruvchi 8080 dona “Tramadol” tabletkasi borligi aniqlandi.
Shuningdek, Sirdaryo viloyati Sirdaryo tumani hududida harakatlanayotgan Cobalt rusumli avtomashina to‘xtatilib tekshirilganda, uning yukxonasidan 1980 dona “Tramadol” tabletkasi topildi. Ma’lum bo‘lishicha mazkur avtomobil egasi Toshkent shahridan olingan ushbu giyohvandlik vositalarini mamlakatning shimoliy mintaqasiga yetkazib berishi kerak bo‘lgan.
Toshkent shahrining Chilonzor tumanida harakatlanayotgan VAZ-2106 avtomashinasi to‘xtatilib, ko‘zdan kechirilganda, uning salonida 3000 dona “Tramadol” tabletkasi borligi aniqlandi.
Hozirda mazkur holatlar bo‘yicha Jinoyat Kodeksining tegishli moddalariga muvofiq jinoiy ishlar qo‘zg‘atilib, tergov doirasida ushbu noqonuniy harakatlarga aloqador shaxslarni aniqlash ishlari olib borilmoqda.
Izoh (0)