Toshkentda “O‘zbekiston-2035” ikkinchi xalqaro forumining rasmiy ochilishi boshlandi

5-fevral kuni Prezident huzuridagi Davlat boshqaruvi akademiyasida “O‘zbekiston-2035” ikkinchi xalqaro forumi boshlandi, deb xabar berdi O‘zA.

Mazkur forum davomida “Buyuk Kelajak” kengashi ekspertlari 2035-yilgacha O‘zbekistonning uzoq muddatli Rivojlanish strategiyasi konsepsiyasi loyihasining muhim iqtisodiy va siyosiy yo‘nalishlari taqdimotini o‘tkazadi.

Takliflarni muhokama qilishda deputatlar, davlat organlari, ilmiy va ta’lim muassasalari, xalqaro tashkilotlar vakillari qatnashadi.

Bugun, forumning umumiy yalpi sessiyasi o‘tkazilib, unda O‘zbekistonning 2035-yilgacha bo‘lgan Rivojlanish strategiyasi konsepsiyasi loyihasining asosiy yo‘nalishlari ko‘rib chiqiladi.

Shundan so‘ng, forum ishtirokchilari strategiyaning asosiy yo‘nalishlarini alohida muhokama qilish uchun “Davlat boshqaruvini rivojlantirish”, “Qishloq xo‘jaligi va to‘qimachilik sanoati”, “Bank tizimi va Komplaens“, “Sanoat”, “Transport, qurilish va infratuzilma, turizm”, “Sog‘liqni saqlash va ijtimoiy siyosat”, “Inson kapitali va madaniyati”, “Ekologiya, ilm-fan, texnologiya va innovatsiyalar” ishchi guruhlariga bo‘linadi.

Ikkinchi kuni barcha ishtirokchilarning yakuniy yig‘ilishi bo‘lib o‘tadi. Unda forum yakunlari sarhisob qilinadi. So‘ng yakuniy materiallar jamlanadi va qabul qilingan takliflar bilan to‘ldiriladi.

Ayni vaqtda forumning rasmiy ochilishi bo‘lib o‘tmoqda.